20-avgustga o‘tar kechasi va payshanba tongida Rossiya tomonidan amalga oshirilgan raketa zarbalari oqibatida poytaxt Kiyev va uning atrofidagi hududlarda kamida 12 kishi halok bo‘ldi.
Ukraina favqulodda xizmatlariga ko‘ra, tungi «yirik hujum» nishonida ko‘p qavatli turar-joy binolari va omborxonalar bo‘lgan. Zarbalar oqibatida kamida 33 kishi jarohatlangan.
Kiyev meri Vitaliy Klichkoning aytishicha, Solomyanskiy tumanida yong‘in kelib chiqqan va to‘qqiz qavatli turar-joy binosining yuqori qavatlari vayron bo‘lgan. U yerda yetti kishi halok bo‘lgan. U juma kunini motam kuni deb e’lon qilishga chaqirdi.
Tunda berilgan zarbalar oqibatida noturarjoy ob’yektlari, omborxonalar, maktab va bolalar shifoxonasi ziyon ko‘rgan. Shifoxonaning derazalari singan va yaqin atrofdagi avtomobillar yonib ketgan.
Merning qo‘shimcha qilishicha, Solomyanskiy tumanidagi sanoat markaziga ham raketalar kelib tushgan.
Davlat energetika kompaniyasi hujum oqibatida elektrsiz qolgan 90 mingga yaqin xonadonning yarmidan ko‘piga elektr energiyasi qayta tiklanganini bildirdi.
Ukraina favqulodda vaziyatlar xizmati xodimlari yong‘in bilan kurashayotgani va vayron bo‘lgan ob’yektlardan odamlarni qutqarayotgani aks etgan videoni namoyish etdi.
Reuters guvohining xabar berishicha, u o‘ndan ortiq portlash ovozini eshitgan.
Kiyev viloyatining Brovari tumaniga uyushtirilgan hujumda esa bir kishi halok bo‘lgan va yana bir kishi jarohatlangan.
