Oʻzbekistonda tadbirkorlik subyektlarining oʻz huquq va manfaatlariga daxldor normativ-huquqiy hujjatlar loyihalarining ishlab chiqilishida ishtirok etishi kafolatlandi.
17-avgust kuni imzolangan qonun bilan, “Tadbirkorlik faoliyati erkinligining kafolatlari toʻgʻrisida”gi qonunga quyidagi mazmundagi 182-modda qoʻshildi:
“Tadbirkorlik subyektlari zimmasiga yangi majburiyat, talab, taqiq, javobgarlik yoki boshqa cheklovlar yuklatilishini nazarda tutuvchi normativ-huquqiy hujjatlar loyihalari va tartibga solish taʼsirini baholash hisoboti bevosita tadbirkorlik subyektlarining hamda ular birlashmalarining ishtirokida muhokama qilinadi.
Tadbirkorlik subyektlari zimmasiga yangi majburiyat, talab, taqiq, javobgarlik yoki boshqa cheklovlar yuklatilishini nazarda tutuvchi normativ-huquqiy hujjatlar loyihalari tartibga solish taʼsiri boʻyicha baholashdan oʻtkaziladi. Bunda ushbu hujjatlarning qabul qilinishiga normativ-huquqiy hujjatlar loyihalari boʻyicha tartibga solish taʼsirini baholash natijalari yuzasidan xulosa beruvchi organlarning xulosalari mavjud boʻlgan taqdirda yoʻl qoʻyiladi.
Tadbirkorlik subyektlarining huquqlariga va qonuniy manfaatlariga daxldor normativ-huquqiy hujjatlar loyihalari tegishli loyihani ishlab chiquvchi tomonidan Normativ-huquqiy hujjatlar loyihalari muhokamasi portaliga jamoatchilik muhokamasi uchun joylashtirilishi kerak, bundan davlat sirlarini yoki qonun bilan qoʻriqlanadigan boshqa sirni tashkil etuvchi loyihalar mustasno.
Tadbirkorlik subyektlarining huquqlariga va qonuniy manfaatlariga daxldor normativ-huquqiy hujjatlar loyihalari Adliya vazirligi tomonidan ularning huquqiy ekspertizasi oʻtkazilishidan oldin Prezident huzuridagi Tadbirkorlikni qoʻllab-quvvatlash boʻyicha jamoatchilik kengashi muhokamasidan oʻtkazilishi kerak”.
Mazkur qonun 2026-yil 18-noyabrdan kuchga kiradi.
Maʼlumot uchun, normativ-huquqiy hujjatlar qabul qilish huquqi Oliy Majlis palatalari, Prezident, Vazirlar Mahkamasi, vazirliklar va idoralar hamda mahalliy hokimliklarga berilgan.
Eslatib oʻtamiz, 2021-yil mart oyidan boshlab barcha (!) normativ-huquqiy hujjatlar loyihalari majburiy tartibda (!!) jamoatchilik muhokamasi uchun joylashtirilishi belgilangan edi. Lekin bu talab 2022-yil aprelida imi-jimida bekor qilib yuborilgan.
NHH loyihalarining jamoatchilik muhokamasi boʻyicha topshiriq bajarilaptimi?
