Xorvatiya sudi 20-avgust kuni «Shimoliy oqim» va «Shimoliy oqim-2» gaz quvurlarini portlatishga aloqadorlikda gumon qilinayotgan ukrainalik g‘avvos Vladimir J.ni hibsda saqlash to‘g‘risida qaror chiqardi.
U mazkur ish bo‘yicha aniqlangan ikkinchi gumondor hisoblanadi. Xorvatiya rasmiylari Germaniyaning uni ekstraditsiya qilish haqidagi so‘rovini ko‘rib chiqayotgan vaqtda Vladimir J. hibsda qoladi.
AFP agentligi ma’lumotiga ko‘ra, sudya ehtiyot chorasini tanlashda gumondorning qochib ketish xavfi mavjudligini asos qilib ko‘rsatgan.
OAV: gumondor film suratga olish maydonchasida ushlangan
Legal Tribune Online portali ma’lumotiga ko‘ra, ukrainalik Hollivudning Snake Island filmi suratga olinayotgan maydonchada qo‘lga olingan. Amerikalik rejissyor Dag Layman suratga olayotgan film syujeti «Shimoliy oqim» gaz quvurlaridagi portlashlar bilan bog‘liq voqealarga asoslangani aytilmoqda. Unda Edrian Broudi va Shon Penn kabi aktyorlar ishtirok etmoqda.
Der Spiegel nashrining tasdiqlanmagan ma’lumotlariga ko‘ra, Vladimir J. film ijodiy guruhida maslahatchi sifatida ishlagan.
U bir yil avval Polshada ham qo‘lga olingan edi. Biroq o‘shanda Polsha sudi uni Germaniyaga ekstraditsiya qilishni rad etgan.
«Shimoliy oqim» portlashlari bo‘yicha birinchi gumondor - Ukraina fuqarosi Sergey K. hozir Germaniyada hibsda saqlanmoqda. U 2025-yil avgustda Italiyadan Germaniyaga ekstraditsiya qilingan.
Germaniya Federal prokuraturasi Sergey K.ga fuqarolik energetika infratuzilmasiga hujum qilish bilan bog‘liq ayblovlar qo‘ygan. Tergov versiyasiga ko‘ra, u gaz quvurlarini portlatishda ishtirok etgan diversiya guruhiga rahbarlik qilgan.
«Shimoliy oqim»dagi portlashlar
«Shimoliy oqim» va «Shimoliy oqim-2» gaz quvurlarining Boltiq dengizi tubidan o‘tgan to‘rt tarmog‘idan uchtasi 2022-yil sentyabr oyi oxirida portlashlar oqibatida ishdan chiqqan.
O‘sha paytda ushbu quvurlarning hech biri orqali gaz yetkazib berilmayotgan edi. Rossiya «Shimoliy oqim» orqali gaz yetkazib berishni portlashlardan sal oldin to‘xtatgan, «Shimoliy oqim-2» esa Rossiyaning Ukrainaga keng ko‘lamli bostirib kirishi ortidan umuman ishga tushirilmagan.
2026-yil iyul oyida Germaniya Federal prokuraturasi 2022-yildagi «Shimoliy oqim» va «Shimoliy oqim-2» portlashlari Ukraina davlat organlarining topshirig‘i bilan tashkil etilgan, degan xulosaga kelgani xabar qilingan.
