Ukraina prezidenti Volodimir Zelenskiy Rossiyaning mashhur «Masha va ayiq» animatsion seriali ijodkorlariga nisbatan sanksiyalar kiritdi. Bu haqdagi farmon 20-avgust kuni kechqurun Ukraina prezidentining rasmiy saytida e’lon qilindi.
Cheklovlar multserialni yaratgan «Animakkord» studiyasi hamda Rossiyaning besh nafar fuqarosiga nisbatan joriy etilgan. Ular orasida studiya asoschisi va bosh direktori, multserial ssenariy muallifi hamda asarga bo‘lgan huquq egasi bor.
Ukraina prezidenti saytida keltirilgan izohga ko‘ra, «Masha va ayiq» mamlakat milliy xavfsizligi uchun tahdid sifatida baholangan. Ukraina tomoni multserialda bolalar uchun mo‘ljallangan kontent niqobi ostida «rossiyaparast g‘oyalar» tarqatilayotganini da’vo qilmoqda.
«RBK-Ukraina» nashrining yozishicha, Zelenskiyning mazkur qarori mamlakat hududida «Masha va ayiq» multserialini namoyish etishni taqiqlash uchun huquqiy imkoniyat yaratadi.
Shu kuni Zelenskiy Rossiyaga qarshi sanksiyalarni nazarda tutuvchi Ukraina Milliy xavfsizlik va mudofaa kengashining qarorlarini kuchga kirituvchi yana uchta farmonni ham imzoladi.
Ushbu cheklovlar Rossiya harbiy-sanoat kompleksi korxonalari, rossiyalik amaldorlar va jismoniy shaxslar, shuningdek, Oleg Deripaskaga aloqador «Rusal» guruhi tarkibidagi kompaniyalarga qaratilgan.
Avvalroq, 2026-yil iyun oyida Estoniya tashqi ishlar vaziri Margus Saxkna «Masha va ayiq» multfilmini «Kreml yumshoq kuchining bir qismi» deb atagan edi. Uning da’vosiga ko‘ra, multserial bolalar ko‘ngilochar kontenti orqali Kreml tarafdori bo‘lgan va militaristik qarashlarni singdiradi, shuningdek, Rossiya agressiyasi va imperiyaviy ambitsiyalarini odatiy hol sifatida ko‘rsatadi.
Ayni paytda multserial xalqaro striming platformalarida ham keng tarqalgan. 2026-yil iyun oyida Deadline nashri Netflix «Masha va ayiq»ning ikkita yangi mavsumiga huquqlarni sotib olgani, shuningdek, avvalgi mavsumlar va loyiha spin-offlarini namoyish qilish bo‘yicha kelishuvni uzaytirganini xabar qilgan edi.
