22–23-avgust kunlari Latviya, Litva va Estoniya, shuningdek, Polsha Belarus hududlaridan kuchli «Priska» sikloni oʻtdi. Kuchli yomgʻir va soniyasiga 30 metrdan yuqori tezlikda esgan shamol bilan kechgan boʻron tufayli kamida ikki kishi halok boʻlgan. Qurbonlardan biri – Litva shimoli-sharqidagi Anikshay rayonida roʻyxatga olingan, uni daraxt bosib qolgan. Latviyaning Yelgava shahrida esa yana bir kishi qulagan bino xarobalari ostida qolib ketgan.
Latviyada 14 kishi tibbiy yordam soʻrab murojaat qilgan, ulardan ayrimlarining jarohati jiddiy. Odamlar aksar hollarda daraxt yoki daraxt shoxlari qulashidan jabrlangan. Ayrimlar ustiga daraxt qulagan avtomobillar ichida qamalib qolishgan. Riga shahri aeroporti reyslar kechikishi mumkinligidan ogohlantirib, yoʻlovchilarga parvozlar haqidagi maʼlumotlar yangilanishini kuzatib borishni tavsiya qilgan.
Litvadagi qutqaruv xizmatlari ham juda koʻp joylarda daraxtlar qulagani va buning oqibatida bir kishi jarohatlangani haqida xabar bergan.
Boʻron tufayli elektr taʼminotida uzilishlar yuzaga kelgan. Buning asosiy sababi daraxtlar yiqilishi oqibatida elektr uzatish liniyalari uzilishi boʻlgan. Latviyada 250 mingdan ortiq uy xoʻjaligi elektrsiz qolgan, Litvada – 150 mingdan ortiq; Estoniyada shanba kuni kechqurun elektrdan uzilgan uy xoʻjaliklari soni qariyb 3,5 mingtani tashkil etayotgandi, ammo yakshanba kungi tongiga kelib bu raqam 2,6 mingtagacha kamaydi. Polshada 145 mingdan ortiq xonadonda elektr oʻchgan, Belarusda esa 650 dan ortiq aholi yashash manzillarida uzilishlar qayd etilgan.
Bundan tashqari, Latviyada LMT va Tele2 mobil operatorlarining ayrim mijozlari aloqadagi muammolardan shikoyat qilishgan.
Latviya, Litva va Estoniyadagi shaharlarda koʻchalarni suv bosgan. Estoniyadan xabar qilishlaricha, bir kun ichida 50–70 millimetr hajmdagi yogʻin tushgan, ayrim hududlarda bu miqdor 90 millimetrgacha yetgan. Kuchli yomgʻir tufayli ayrim daryolarda, masalan, Riga shahri oralab oqib oʻtadigan Daugava daryosida suv sathi koʻtarilgan. Shaharda transport harakati, jumladan, avtobuslar yurishi qiyinlashgan, favqulodda xizmatlar xodimlari yoʻllardagi suvni nasoslar orqali olib chiqishmoqda. Bundan tashqari, koʻplab binolarning yertoʻlalari hamda koʻp qavatli uylarning birinchi qavatlarini suv bosgan.
23-avgust kuni ham hududda shamol haqidagi ogohlantirish saqlanib qolmoqda.
