Prezident Shavkat Mirziyoyev 28-avgustda Toshkentda Oʻzbekiston Respublikasi davlat mustaqilligining 35 yilligiga bagʻishlangan tantanali marosimda nutq soʻzladi.
Davlat rahbari bugun mamlakatimiz tarixning yanada masʼuliyatli va hal qiluvchi pallasida turganini, taraqqiyotning mutlaqo yangi davriga qadam qoʻyayotganini taʼkidladi.
– Kelgusi oʻn yillik biz uchun milliy yuksalish davri boʻladi, – dedi Mirziyoyev.
Mazkur davrni faqat xalqimizning aql-zakovati, mehnati va birdamligi orqali bunyod etish mumkinligi qayd etildi.
Shu maqsadda kelgusi yillarda inson qadrini yanada yuksaltiradigan 7 ta milliy dastur amalga oshiriladi.
Birinchi milliy dastur bilim va malakani kelgusi taraqqiyotning asosiy kapitaliga aylantirishga qaratilgan. Bolalarning 6 yoshli tayyorlov guruhlariga qamrovi qisqa muddatda 100 foizga yetkaziladi. Xususiy bogʻcha tashkil qilish boʻyicha mavjud imtiyozlar saqlab qolinadi.
Ikkinchi milliy dastur xalqning sogʻlom boʻlishi va uzoq umr koʻrishini taʼminlashga xizmat qiladi. Aholi salomatligi bilan bogʻliq davlat xarajatlari kelgusi besh yilda yalpi ichki mahsulotga nisbatan 5 foizga yetkaziladi.
– Uchinchi milliy dastur – iqtisodiyotimizni yuqori texnologiya va mehnat unumdorligi modeliga oʻtkazish, – dedi davlat rahbari. Buning uchun kelgusi oʻn yilda 450 milliard dollar xorijiy investitsiya jalb qilinadi.
Toʻrtinchi milliy dastur suv va tabiatga munosabatni tubdan oʻzgartirishga qaratiladi. Kelgusi besh yilda ekin maydonlarida suv tejaydigan texnologiyalarning qamrovi 100 foizga yetkaziladi.
Beshinchi milliy dastur sud mustaqilligini kuchaytirish va qonun ustuvorligini umumiy qadriyatga aylantirishga qaratilgan. Huquqiy tarbiya maktabdan boshlab aniq tizim asosida yoʻlga qoʻyiladi. Fuqarolar va tadbirkorlarning qonuniy kafolatlarini kuchaytirish boʻyicha islohotlar qatʼiy davom ettiriladi.
Oltinchi milliy dastur mahallani jamiyat taraqqiyotining asosiy buyurtmachisiga aylantirishga yoʻnaltiriladi.
– Endi davlat dasturlarini ishlab chiqish boʻyicha yondashuv butkul oʻzgaradi, dedi prezident.
Tuman byudjeti, investitsiya dasturi va infratuzilma loyihalari mahalla buyurtmasi asosida ishlab chiqiladi. Fuqarolarning talab va ehtiyoji, mahallaning farovonligi eng asosiy mezon sifatida belgilanadi.
