«Credit House» ishini apellyatsiyada koʻrish Toshkent viloyat sudiga oʻtkazib yuborildi
|17:471 5476 min
Ikki oydan buyon Toshkent shahar sudi apellyatsiya instansiyasida koʻrilayotgan «Credit House» ishi Oliy sud topshirigʻi bilan Toshkent viloyat sudiga oʻtkazildi. Birinchi instansiya sudi 9 nafar sudlanuvchining olti nafarini turli muddatlarga ozodlikdan mahrum etgan va uch nafarini ochiqda qoldirgan edi. Ish doirasida jabrlanuvchilar ikki ming nafar atrofida, umumiy zarar esa 490 mlrd soʻmdan oshadi.
Foto: Kun.uzFoto: Kun.uz
Joriy yil 24-aprel kuni jinoyat ishlari boʻyicha Yakkasaroy tuman sudida “Credit House” va “Infin Story Invest” qurilish korxonalari mansabdorlariga nisbatan sud hukmi oʻqilgandi.
Hukm ustidan kiritilgan shikoyat boʻyicha shu yil 25-iyundan Toshkent shahar sudi apellyatsiya instansiyasida ishni koʻrish boshlangandi.
Oradan 2 oy vaqt oʻtib, Oliy sud raisi birinchi oʻrinbosari Alisher Usmonovning koʻrsatmasi bilan ushbu jinoyat ishi mazmunan koʻrib chiqish uchun Toshkent viloyat sudiga oʻtkazilgan.
Kun.uz bilan bogʻlangan jabrlanuvchilardan birining aytishicha, sud jinoyat ishining bir hududdan boshqasiga oʻtkazilishi sabablarini tushuntirib oʻtirmagan.
Jinoyat ishi boʻyicha minglab jabrlanuvchilarning aksariyati Toshkent shahrida istiqomat qiladi. Bu bizga qoʻshimcha noqulayliklar tugʻdirishi aniq, deydi fuqaro.
Eslatib oʻtamiz, 2025-yilning eng shov-shuvli firibgarlik ishi deya taʼrif berilgan “Credit House” ishi boʻyicha 9 kishi jinoiy jazoga tortilgan.
Sud hukmiga koʻra, sudlanuvchilarga quyidagicha jazo tayinlangan:
Hikmatullayev Bahrom Behzod oʻgʻli – Jinoyat kodeksining 168-moddasi 4-qismi “a, v” bandlari (firibgarlik), 170-moddasi 2-qismi “a, v” bandlari (aldash yoki ishonchni suiisteʼmol qilish yoʻli bilan mulkiy zarar yetkazish), 189-moddasi 1-qismi (savdo yoki xizmat koʻrsatish qoidalarini buzish) va 28,192-11-moddasi 2-qismi “a, b” bandlari (nodavlat tijorat tashkilotida yoki boshqa nodavlat tashkilotida mansabdor shaxslar tomonidan oʻz vakolatlarini suiisteʼmol qilish) boʻyicha aybli deb topilib, 8 yil 1 oy muddatga ozodlikdan mahrum qilish;
Shamsiddinov Alisher Muhammadiyevich – Jinoyat kodeksining 168-moddasi 4-qismi “a, v” bandlari bilan aybli deb topilib, BHMning 234,5 baravari miqdorida jarima jazosi;
Tolipova Klara Nodir qizi – Jinoyat kodeksining 168-moddasi 4-qismi “a, v” bandlari, 170-moddasi 2-qismi “a, v” bandlari, 189-moddasi 1-qismi va 28,192-11-moddasi 2-qismi “a, b” bandlari boʻyicha aybli deb topilib, 6,5 yil ozodlikdan mahrum qilish jazosi tayinlandi. Jazo shartli hisoblanib, 3 yil sinov muddati belgilandi;
Mirkamolov Gʻayrat Rixsiyevich – Jinoyat kodeksining 168-moddasi 4-qismi “a, v” bandlari, 170-moddasi 2-qismi “a, v” bandlari, 189-moddasi 1-qismi, 28,192-11-moddasi 2-qismi “a, b” bandlari boʻyicha aybli deb topilib,
Mavzuga oid
8 yil 1 oy muddatga ozodlikdan mahrum qilish;
Galyamova Robiya Albertovna – Jinoyat kodeksining 168-moddasi 4-qismi “a, v” bandlari, 170-moddasi 2-qismi “a, v” bandlari, 189-moddasi 1-qismi va 28,192-11-moddasi 2-qismi “a, b” bandlari boʻyicha aybli deb topilib, 6,5 yil ozodlikdan mahrum qilish jazosi tayinlandi. Jazo shartli hisoblanib, 3 yil sinov muddati belgilandi;
Amzayev Baxtiyor Lennarovich – Jinoyat kodeksining 168-moddasi 4-qismi “a, v” bandlari, 170-moddasi 2-qismi “a, v” bandlari va 192-11-moddasi 2-qismi “a, b” bandlari boʻyicha aybli deb topilib, 9yil ozodlikdan mahrum qilish;
Rahimova Shoira Shokirjonovna – Jinoyat kodeksining 168-moddasi 4-qismi “a, v” bandlari, 170-moddasi 2-qismi “a, v” bandlari va 28,192-11-moddasi 2-qismi “a, b” bandlari boʻyicha aybli deb topilib, 6,5yil ozodlikdan mahrum qilish jazosi tayinlandi. Jazo shartli hisoblanib, 3 yil sinov muddati belgilandi;
Mahamadov Shuhrat Shokirjon oʻgʻli – Jinoyat kodeksining 168-moddasi 4-qismi “a, v” bandlari, 170-moddasi 2-qismi “a, v” bandlari va 28,192-11-moddasi 2-qismi “a, b” bandlari boʻyicha aybli deb topilib, 8 yil 1 oymuddatga ozodlikdan mahrum qilish;
Bajenov Dmitriy Viktorovich – Jinoyat kodeksining 168-moddasi 4-qismi “a, v” bandlari, 170-moddasi 2-qismi “a, v” bandlari, 189-moddasi 1-qismi, 192-11-moddasi 2-qismi “a, b” bandlari boʻyicha aybli deb topilib, 9yil ozodlikdan mahrum qilish.
Shuningdek, sudlanuvchilardan jabrlanuvchilarga yetkazilgan zararni undirish belgilangan.
Dmitriy Bajenov va Alisher Shamsiddinovning 681 mln soʻmlik 2 ta Toyota, Shuhrat Mahammadovning 93 mln soʻmlik Spark hamda Gʻayrat Mirkamolovning 126 mln soʻmlik Cobalt mashinalari yetkazilgan zararni qoplash uchun undiruvga qaratildi. MChJlarning hisobraqamidagi pullar jabrlanuvchilarga teng taqsimlanishi maʼlum qilingan.
Nima uchun 2025-yilning eng shov-shuvli firibgarlik ishi?
Maʼlum boʻlishicha, “Credit House” va “In Fin Stroy Invest” qurilish korxonalari kvartira sotish vaji bilan 2000 nafar fuqaroni aldab, 490 mlrd soʻm pullarini oʻzlashtirgan.
Bu haqda davlat rahbari shu yil 27-yanvarda oʻtkazgan yigʻilishda toʻxtalgan. Shavkat Mirziyoyev Oʻzbekistonda uyushgan jinoyatchilik biznes niqobi ostida daromadli sohalarga kirib borayotganini tanqid qilgan.
“Ilgari faqat “koʻcha” deb bilgan uyushgan jinoyatchilik bugun biznes niqobi ostida ancha daromadli sohalarga kirib boryapti. Ayniqsa, jinoiy toʻdalar faoliyati koʻp qavatli uylar, avtomashinalar oldi-sotdisi, moliyaviy piramidalar tashkil qilish, Umra va Haj ziyoratiga yuborishda ancha koʻpaygan.
Shaharda kvartira sotish masalasida 3 000 dan ziyod fuqaroga 1,3 trln soʻm zarar yetkazilgan. Misol uchun, “Credit House”, “Infin Story Invest” qurilish korxonalari kvartira sotish vaji bilan 2000 nafar fuqaroni aldab, 490 mlrd soʻm pullarini oʻzlashtirgan.
Yoki “Umid Avtolizing”, “Halol Avtolizing” kompaniyasi kabi firmalar jami 1800 nafar fuqaroga avtomashina yetkazib berishni vaʼda qilib, ularning 80 mlrd soʻmini qoʻlga kiritgan. Oʻzbekistonda boʻlyapti bu gaplar. Shuningdek, “Jalolquduq Aviatrans” korxonasi Umra ziyorati boʻyicha 534 nafar fuqaroni aldab, shunchaki Saudiya Arabistoniga yuborish bilan cheklangan, yetkazilgan zarar 18 mlrd soʻm boʻlgan. Bu ham haqiqat, bu ham Oʻzbekistonda boʻlyapti. Lekin hech kim bong urmaydi. Jahongir Xatamov (Bosh prokuratura huzuridagi Departament rahbari – tahr.) tashkiloti bunday uyushgan jinoiy guruhlar faoliyatiga qachon barham beradi? Sizlar qilmasangiz kim qiladi, Xatamov?” – degan edi Shavkat Mirziyoyev.
