Bosh prokuratura huzuridagi departamentning Nurota tumani boʻlimi va boshqa huquqni muhofaza qiluvchi organlar hamkorligida tezkor tadbir oʻtkazildi.
Departament maʼlumotiga koʻra, Gʻozgʻon shahar tibbiyot birlashmasi Markaziy poliklinikasi mudiri oʻrinbosari F.T. fuqaro O.A.ni shahar tibbiyot birlashmasiga hamshira vazifasiga ishga joylashtirib berishni vaʼda qilgan.
Mansabdor buning evaziga 1 500 AQSH dollari talab qilgani aytilmoqda.
Tezkor tadbir davomida u mazkur mablagʻni olgan vaqtda ashyoviy dalillar bilan ushlangan.
Holat yuzasidan Jinoyat kodeksining 168-moddasi - firibgarlik bilan jinoyat ishi qoʻzgʻatilgan.
Hozirda tergov harakatlari olib borilmoqda.
