Qoʻmita xabarida qayd etilishicha, oʻtgan asrning 60–70-yillarida Nurota tizma togʻlarida Qizilqum arxarlarining atigi 60–70 boshi qolgan.
1975-yilda Nurota davlat qoʻriqxonasi tashkil etilib, arxarlar muhofaza ostiga olingan. Bu yoʻqolib borayotgan populyatsiyani saqlab qolish imkonini bergan. Keyingi oʻn yillikda ularning soni barqarorlashgan.
Qoʻmitaga koʻra, olib borilayotgan muhofaza choralari natijasida arxarlar soni koʻpaymoqda. Oxirgi bahorgi sanoqda 2130 bosh qayd etilgan.
Qizilqum arxari zaif, soni qisqarib borayotgan va alohida hududlarda tarqalgan kenja tur sifatida Oʻzbekiston Qizil kitobi, Tabiatni muhofaza qilish xalqaro ittifoqining Qizil roʻyxati hamda CITES konvensiyasining II ilovasiga kiritilgan.
Hozirda bu jonivorlar Nurota va Oqtogʻ tizmalarida, Tomditogʻ qoldiq togʻlarida hamda Turkiston tizmasida saqlanib qolgan. Qoʻmita maʼlumotida ular Molguzar tizmasida ham uchrashi mumkinligi qayd etilgan.
Qizilqum arxarlari togʻlarning oʻrta va yuqori qismlarida, dengiz sathidan 500–2000 metr balandlikda yashaydi.
