Aholiga suyultirilgan gaz yetkazib berish tizimi qayta tashkil etiladi. Profilaktika inspektoriga mahallada yoʻl harakati qoidasini buzish bilan bogʻliq maʼmuriy jazoni qoʻllash vakolati beriladi. Toshkent-Parkent yoʻnalishida elektropoyezd qatnovi yoʻlga qoʻyildi. 6 oyda 11 mingdan ortiq kishi ozodlikdan mahrum qilindi, ularning aksariyati giyohvandlik bilan bogʻliq. Chorvoq suv omborida fojia yuz berdi: ota-oʻgʻillar choʻkib ketdi. Kunning muhim yangiliklari bilan tanishtiramiz.
Aholiga suyultirilgan gaz yetkazib berish tizimi qayta tashkil etiladi
Prezident Shavkat Mirziyoyev aholini suyultirilgan gaz bilan taʼminlash tizimini isloh qilish yuzasidan takliflar taqdimoti bilan tanishdi.
Maʼlumotlarga koʻra, respublikada 3,8 millionga yaqin aholi hamda qariyb 2 mingta ijtimoiy soha obyekti suyultirilgan gaz bilan taʼminlanadi. Joriy yilda aholi va ijtimoiy soha obyektlari ehtiyoji uchun 604,8 ming tonna suyultirilgan gaz yetkazib berish koʻzda tutilgan.
Aholiga suyultirilgan gaz yetkazib berish tizimini qayta tashkil etish maqsadida «Hududgaztaʼminot» taʼsischiligida «LPG-Trade» masʼuliyati cheklangan jamiyatini tashkil etish taklif qilindi. Ushbu tuzilma suyultirilgan gazni birja orqali xarid qilib, belgilangan tartibda odamlarga yetkazib berish bilan shugʻullanadi. Ijtimoiy himoyaga muhtoj qatlamlarga xarid qilingan suyultirilgan gazning har bir kilogrammi uchun kompensatsiya toʻlanadi.
Profilaktika inspektoriga mahallada yoʻl harakati qoidasini buzish bilan bogʻliq maʼmuriy jazoni qoʻllash vakolati beriladi
Prezident qaroriga koʻra, ichki ishlar organlari jamoat xavfsizligini taʼminlash boʻlinmalarining faoliyati qayta, yaxlit tizim sifatida tashkil etiladi.
Profilaktika inspektorining xizmat vazifasini bajarishiga toʻsqinlik qilganlik uchun maʼmuriy javobgarlik belgilanadi.
Profilaktika inspektoriga qoʻshimcha vakolatlar beriladi, jumladan yoʻl harakati xavfsizligini taʼminlash borasida mahalla koʻchalari va yoʻlaklarida yoʻl harakati qoidalari buzilishi bilan bogʻliq 4 turdagi maʼmuriy huquqbuzarlik boʻyicha maʼmuriy jazo qoʻllashi mumkin boʻladi (ular hali eʼlon qilinmadi).
Shuningdek, profilaktika inspektorlarining huquqiy mavqeyi va xizmat masʼuliyati oshiriladi.
Toshkent-Parkent yoʻnalishida elektropoyezd qatnovi yoʻlga qoʻyildi
7-sentabrdan Toshkent va Parkentni bogʻlovchi shaharlararo elektropoyezd qatnovi yoʻlga qoʻyildi. Elektropoyezdda 586 ta oʻrin boʻlib, 1154 tagacha yoʻlovchi tashish imkoni bor.
Chiptalar narxi kattalar uchun 10 ming soʻmgacha, 10 yoshgacha boʻlgan bolalarga 6,5 ming soʻm qilib belgilangan. Yoʻlovchilar manzilga 50 daqiqada yetib borishi mumkin.
Mazkur loyiha Parkent tumanining turistik salohiyatini oshirishga ham xizmat qilishi kutilmoqda.
6 oyda 11 mingdan ortiq kishi ozodlikdan mahrum qilindi
2026-yilning birinchi yarmida Oʻzbekistonda jami 11703 nafar shaxs ozodlikdan mahrum qilingan. Bu oʻtgan yilning shu davriga nisbatan 2133 nafarga koʻp.
Bu davrda ikki nafar mahbusga umrbod ozodlikdan mahrum qilish jazosi berilgan. Qamoq jazosiga hukm qilinganlarning 179 nafari qasddan odam oʻldirish, 1376 nafari ogʻir va oʻrtacha ogʻir tan jarohati yetkazish, 1789 nafari bezorilik bilan bogʻliq jinoyat sodir qilgan. Qamalganlarning qariyb yarmi (5788 kishi) narkojinoyatlar boʻyicha aybli deb topilgan. Korrupsiya jinoyatlari boʻyicha 3605 nafar shaxs sudlanib, ularning 779 nafari ozodlikdan mahrum qilingan.
Chorvoq suv omborida fojia yuz berdi: ota-oʻgʻillar choʻkib ketdi
2-sentabr kuni Toshkent viloyati, Boʻstonliq tumani, Burchmulla mahallasi hududidagi Chorvoq suv omborida 3 kishi – ota va uning 2 oʻgʻli choʻkib ketdi.
FVV matbuot xizmati maʼlumotiga koʻra, shu kuni er-xotin, ikki oʻgʻil va bir qizdan iborat oila suv omborida sayr qilish uchun kater ijaraga olgan.
Taʼkidlanishicha, suratga tushish uchun toʻxtalgan vaqtda oʻgʻillardan biri choʻmilishga qaror qilgan. U qutqaruv nimchasidan foydalanmagani aytilmoqda. Taxmin qilinishicha, suvda yigitning oyoq tomiri tortishib qolgan. Uni qutqarish uchun avval ota, soʻng ikkinchi oʻgʻil ham suvga sakragan. Biroq uchalasi ham choʻkib ketgan. Kater haydovchisi ularni qutqarishga harakat qilgani, ammo buning imkoni boʻlmagani taʼkidlanmoqda.
Ularning jasadi qutqaruvchilar tomonidan qidirilmoqda. Qoʻshimchasiga Sirdaryo va Jizzax viloyatlaridan ham qutqaruv otryadlari jalb qilingan.
