Jenevada BMT Inson huquqlari kengashida soʻzga chiqqan komissar, majburiy qoidalar va ishonchli xavfsizlik mexanizmlarisiz kuchli SI tizimlarining yanada tarqalishi oʻta jiddiy oqibatlarga olib kelishi mumkinligini taʼkidlab oʻtdi.
Tyurkning fikricha, insoniyat texnologiya sohasining ixtiyoriy oʻz-oʻzini tartibga solish imkoniyatlari yetarli boʻlmay qoladigan nuqtaga yaqinlashmoqda. U eng ilgʻor tizimlar inson nazorati ostida ekan, ishlab chiquvchilar va kompaniyalar uchun oldindan aniq cheklovlar oʻrnatish zarur, deb hisoblaydi.
Sunʼiy intellekt ustidan nazoratni yoʻqotish xavfi
Oliy komissar asosiy tahdidlardan biri sifatida shu qadar kuchli va avtonom SI tizimlarining paydo boʻlish ehtimolini aytdiki, ularning yaratuvchilari ularni kafolatli boshqara olmay qoladilar.
Tyurk sunʼiy intellekt modellari oʻz faoliyatini saqlab qolishga qaratilgan xatti-harakatlarni namoyish etgan, jumladan, tizimni oʻchirish tahdidi yuzaga kelgan vaziyatlardagi tajribalar haqidagi xabarlarga eʼtibor qaratdi.
«Sinov muhitidan chiqib ketadigan yoki oʻzini oʻchirishga yoʻl qoʻymaslik uchun ishlab chiquvchilarni shantaj qiladigan sunʼiy intellekt – bu haddan tashqari qudratli SI demakdir», - dedi u. - Bugun men, kech boʻlmasidan, sunʼiy intellekt xavfsizligi va himoyasining metin kafolatlarini yaratish uchun barcha saʼy-harakatlarni safarbar etishga chaqiraman».
Oliy komissar davlatlar va texnologiya kompaniyalarini bunday tizimlarning xavfli yoki kutilmagan xatti-harakatlarining oldini olishga imkon beruvchi ishonchli himoya mexanizmlarini imkon qadar tezroq ishlab chiqishga undadi.
Uning taʼkidlashicha, zarur choralar sunʼiy intellekt imkoniyatlari uni nazorat qilish ancha qiyinlashadigan darajaga yetmasidan avval koʻrilishi lozim.
«Deyarli cheksiz hokimiyat»
Biroq muammo faqat texnik xavflardan iborat emas, deb taʼkidladi BMT vakili. Tyurk sunʼiy intellekt sohasida resurslar va taʼsirning oʻta yuqori darajada jamlanganiga eʼtibor qaratdi.
«Ozchilik odamlar sunʼiy intellekt ustidan deyarli cheksiz hokimiyatga ega», - dedi u.
Gap ilgʻor modellar va hisoblash quvvatlari ustidan nazorat, shuningdek, yirik texnologiya kompaniyalari tomonidan toʻplanadigan va qayta ishlanadigan ulkan hajmdagi maʼlumotlar haqida bormoqda.
