Bin Lodin yonidagi MI6 agenti
Usoma bin Lodin terakt vaqtida Afgʻonistonda yashagan. «Tolibon» nazoratidagi davlatda harbiy poligon yaratib, terrorchilarni tayyorlagan. Uning makonlari togʻ orasida boʻlgan. Elektron vositalardan foydalanmagani uchun uning joyini aniqlash oson boʻlmagan. Lekin dunyodagi eng qudratli razvedka idoralaridan biri MI6 bin Lodinning oldiga oʻz agentini kirita olgan. Toʻgʻrirogʻi, «Al Qoida» liderining yaqinidagi odamlardan birini oʻziga ishlashga koʻndira olgan. Uning ismi Ayman Din. U ham xuddi bin Lodin kabi saudiyalik.
Ayman oʻz vaqtida Bosniyada jang qilgan, shaxsan bin Lodinga sodiqlik qasamini ichgan. Guruhning eski aʼzolaridan, portlovchi moddalar yasash boʻyicha asosiy mutaxassislardan biri boʻlgan. 1998-yil «Al Qoida» Amerikaning Tanzaniya va Keniyadagi elchixonalarini portlatishi oqibatida yuzlab tinch aholi vakillari halok boʻladi. Ayman oʻsha voqealardan keyin bin Lodin va «Al Qoida» hech qanday «muqaddas urush»da qatnashmayotgani, toʻliq terror bilan shugʻullanayotganini tushunib yetadi. Ayollar, bolalar, begunoh odamlar halok boʻlishini islomga zid deb bilgan Ayman guruhdan ketishga qaror qiladi.
Afgʻonistonni tark etib, Qatarga borgan vaqtida mahalliy maxsus xizmat uni qoʻlga olib, Britaniyaga topshiradi. Inglizlar Aymanga ikki tomonlama agent, yaʼni «quloq» boʻlishni taklif qiladi. Rozi boʻlib Afgʻonistonga qaytgan Ayman agent ekanini bildirmay ishlashda davom etadi. U elektron qurilmalardan foydalana olmagani sabab har zamonda guruhning ishlari yoki salomatligini bahona qilib Pokistonga borib, u yerdagi MI6 agentlariga maʼlumot berib turadi.
Aynan u bergan maʼlumotlar asosida Nyu-York metrosidagi terakt oldi olingani aytiladi. 11-sentabr teraktidan keyin ham Ayman Din guruh tarkibida faoliyatini davom ettiradi. Lekin 2006-yil amerikaliklar u aniqlagan maxfiy maʼlumotni oshkor qilib qoʻygach, Ayman fosh etilishi muqarrar boʻlib qoladi. Britaniya uni tezda evakuatsiya qiladi.
Abdulazizning tushi
Ayman Din oʻz hikoyalaridan birida Nyu-York terakti bilan bogʻliq qiziq voqeani aytib bergan. Guruh aʼzolaridan biri tushida samolyot koʻrinishidagi katta yashil qushga minib baland minoraga urilgani, bu minora uning nishoni boʻlganini aytib, Aymandan buning taʼbirini soʻraydi. Bombalar boʻyicha mutaxassis qanday taʼbir qilardi, olis oʻlkalarda oʻlim topsang kerak, deydi-qoʻyadi.
Bu suhbatni koʻpchilik Muhammad Otiyf deb biladigan «Al Qoida» harbiy qanoti liderlaridan biri Abu Hafs al Masri eshitib qoladi. Oʻz vaqtida Misr politsiyasida ishlagan Otiyf yigitdan bizning rejalarimiz haqida kimdir senga gapirdimi, deb soʻraydi. Yigit yoʻq, deydi.
Sezgir sobiq politsiyachi uni Usoma bin Lodinning oldiga olib borib, tushida nima koʻrganini aytib berishini soʻraydi. Aytib bergach, bin Lodin «demak seni yuboramiz, zora tushing oʻngidan kelsa», deydi. Yigit lider nima deganini tushunmaydi, lekin keyinroq u haqda butun dunyo eshitadi. Bu American Airlines 11 reysida uchayotgan samolyotni egallab olib, butunjahon savdo markazi shimoliy minorasida portlatgan terrorchilar guruhi aʼzosi edi.
Ayman Din bu gaplarning barchasiga guvoh boʻladi, lekin bu haqda britaniyalik razvedkachilarga xabar berish shart emas, oddiy tush deb oʻylaydi. Yaʼni, bin Lodin Nyu-York teraktida shaxsan qatnashgan guruh aʼzosini tanlagan vaqtda Britaniya razvedkasi agenti oʻsha yerda boʻlgan, lekin teraktning oldini olisholmagan.
Chunki bu ishlar kinolarda aytilganidek buyruqlar, pul yoki boshqa moddiy narsalar uchun qilinmayotgandi. Barchasini hislar, tuygʻular, alamzadalik kayfiyati va hatto mana shunday tushda tuzilgan rejalar hal qilgan. 3-4 ta kinoni koʻrib hammasi mana bunday boʻlgan, deb aytish oson, lekin bir lahza oʻsha odamlar boshidan qanday fikrlar oʻtganikin, deb oʻylab koʻrish koʻpchilikning esiga ham kelmaydi.
Ayman Din britaniyalik razvedkachilarga hisobot berish uchun Londonga yoʻl olganda shahar koʻchalarida odamlar toʻplanib televizor tomosha qilayotganini koʻradi. Borib qarasa, Nyu Yorkdagi egizak binolar olov ichida. Shunda Ayman boyagi yigitning tushidagi nishon anna shu ekanini anglab yetadi.
Reja qanday tuzilgan?
«Al Qoida»dagi yaqinlarining eslashicha, bin Lodin olim ham, diniy ulamo ham emasdi. Shunchaki uning xarizmasi va kuchli nutqidan Ayman az Zavaxiri kabi jihodchilar foydalanishga uringan. Misrlik bu inson bin Lodinning eng yaqin odamlaridan biriga aylanib, unga oʻz fikrini oʻtkazishga urinadi. Guruh vakillarining aytishicha, aynan Zavaxiri bin Lodinga koʻp marta Amerikadagi uzoq masofaga uchadigan samolyotlarni oʻgʻirlab portlatish kerakligi, ular koʻproq yonilgʻi solib yurishi sabab portlash katta boʻlishi haqida gapiravergan. Keyinchalik liderning roziligini olgan Zavaxiri terkatda qatnashgan guruh aʼzolarini samolyot boshqarishga oʻrgatish, ularni moliyalashtirish bilan shugʻullanadi. Zavaxiri bin Lodindan keyin guruhni boshqaradi. Amerikaliklar uni 2022-yil 31-iyul kuni Kobulga dron hujumi orqali oʻldiradi.
Terakt tashkilotchilaridan yana biri Xolid Shayf Muhammad hamon tirik, u haqda koʻplab kinolar olingan. Yaqinda Guantanamo qamoqxonasida saqlanayotgan bu terrorchi ustidan sud navbatdagi marta qoldirildi. Xolid bin Lodinga juda keskin reja taklif qiladi. Unga koʻra, terrorchilar birdaniga oʻnta samolyotni egallashi, uchoqlar Pentagon, MRB, FQB binolari, butunjahon savdo markazi va hatto atom elektro stansiyasiga urilishi kerak edi.
Xolid oʻninchi samolyotda oʻzi uchishi, bortdagi hamma erkaklarni oʻldirib, AQShdagi aeroportda jurnalistlar ishtirokida matbuot anjumani oʻtkazishni va Amerikaga eʼtibozlarini bildirishni maqsad qiladi. Biroq bin Lodin bu juda katta ish boʻlib ketishi, uni boshqarib boʻlmasligini aytadi va 4 ta samolyot egallanishi versiyasida toʻxtaladi.
Ana shunaqa gaplar. Hozircha aniqlaganlarim shu boʻldi, imkon boʻlsa, bu mavzuga yana toʻxtalamiz...
