Farmon 17-sentabr kuni Rossiyaning huquqiy axborot rasmiy portalida eʼlon qilindi. Reuters maʼlumotiga koʻra, Shveysariyaning Nestlé oziq-ovqat konserni va Fransiyaning Auchan chakana savdo guruhiga tegishli Rossiya aktivlari «L.Ye.V. Menedjment» kompaniyasining vaqtinchalik boshqaruviga berilgan.
DW maʼlumotiga koʻra, farmon jami 81 ta korxonadagi aksiya va ulushlarni qamrab oladi. Roʻyxatdan Nestléʼning Rossiyadagi tuzilmalari, Auchanʼning shuʼba korxonalari, shuningdek, Fransiyaning FM Logistics va NG Concept logistika kompaniyalari bilan bogʻliq aktivlar ham joy olgan.
Bundan tashqari, Leroy Merlin tomonidan Rossiyada tashkil etilgan «Le Monlid» kompaniyasidagi ayrim ulushlar ham «vaqtinchalik boshqaruv»ga berilgan.
Yangi farmon boʻyicha aktivlarni boshqarish «L.Ye.V. Menedjment» kompaniyasiga topshirildi.
Rossiya 2023-yildan beri ayrim xorijiy kompaniyalar aktivlarini «vaqtinchalik boshqaruv»ga oʻtkazish mexanizmini qoʻllab kelmoqda. Bu mexanizm avval Danone va Carlsberg kabi kompaniyalarning Rossiyadagi aktivlariga nisbatan ham ishlatilgan.
Reuters qayd etishicha, Rossiya Ukrainaga qarshi keng koʻlamli urush boshlanganidan keyin xorijiy kompaniyalar aktivlari ustidan nazoratni kuchaytirgan. 2023-yilda imzolangan farmon Moskvaga Rossiya «doʻst boʻlmagan» deb hisoblaydigan davlatlar kompaniyalarining aktivlarini vaqtinchalik boshqaruvga oʻtkazish imkonini bergan.
Nestlé Rossiya bozorida faoliyatini davom ettirib kelayotganini va buni aholi uchun asosiy oziq-ovqat mahsulotlarini yetkazib berish zarurati bilan izohlagan. Kompaniya Reutersʼga avvalroq uning aktivlarini vaqtinchalik boshqaruvga oʻtkazish boʻyicha Rossiya rasmiy idoralaridan murojaat olmaganini bildirgan.
