19-sentabr soat 21:00 dan 20-sentabr soat 4:00 gacha Toshkentda havo sifati vaqtincha yomonlashishi mumkin. Bu haqda Ekologiya qoʻmitasi xabar berdi.
Qayd qilinishicha, shu vaqtda AQI (havo sifati) 101–150 - «sezgir guruhlar uchun zararli» darajaga chiqishi kutilmoqda. Ertalab soat 8:00–9:00 larda havo sifati «oʻrtacha» darajaga qaytishi prognoz qilingan.
Xabarga koʻra, bir kun oldin kechqurun Toshkent havosida PM2.5 va ayniqsa PM10 zarrachalari miqdori keskin oshgan.
Avtomatik monitoring stansiyalariga koʻra, havodagi zarrachalar miqdori soat 18:00 dan keyin koʻtarila boshlagan va 21:00–23:00 oraligʻida eng yuqori darajaga yetgan. Soat 22:00 da shahar boʻyicha PM2.5 oʻrtacha 74,5 mkg/m³, PM10 esa 243,6 mkg/m³ ni tashkil etgan. Ayrim hududlarda PM10 miqdori 555,3 mkg/m³ gacha yetgan.
Mutaxassislar fikricha, PM10 miqdorining PM2.5 ga nisbatan ancha yuqori boʻlishi havoda yirik chang zarrachalari koʻpayganini koʻrsatadi.
Holatga, avvalo, uzoq davom etgan quruq ob-havo sabab tuproq va yoʻl yuzasidagi changning havoga koʻtarilishi taʼsir qilgani taʼkidlanmoqda. Kechki va tungi vaqtda kuzatilgan harorat inversiyasi hamda havo almashinuvining sustligi esa chang zarrachalarining yer yuzasiga yaqin qatlamda toʻplanib qolishiga sharoit yaratgan.
Bundan tashqari, CAMS modeli Oʻzbekistonning gʻarbiy va shimoli-gʻarbiy hududlarida PM10 miqdori yuqori boʻlgan chang massalarini qayd etgan. HYSPLIT modeli esa Toshkentga shimol, shimoli-sharq, gʻarb va shimoli-gʻarb tomondan havo oqimlari kirib kelganini koʻrsatgan.
19-sentabrga oʻtar kechasi Mirzo Ulugʻbek tumanining uchta nuqtasida qoʻshimcha oʻlchovlar oʻtkazilgan. Havodagi azot dioksidi, uglerod monoksidi, ammiak, ftor vodorodi, fenol va formaldegid kabi gazsimon ifloslantiruvchi moddalar konsentratsiyasi belgilangan meyorlardan oshmagan.
Soat 23:00 dan keyin PM2.5 va PM10 miqdori asta-sekin kamaya boshlagan. 19-sentabr soat 4:00 ga kelib ular shahar boʻyicha mos ravishda 22,4 va 61,9 mkg/m³ gacha tushgan.
Maxsus komissiya holatni qisqa muddatli chang epizodi sifatida baholamoqda. Uning yuzaga kelishiga quruq ob-havo, mahalliy changning koʻtarilishi, harorat inversiyasi va havo almashinuvining sustligi sabab boʻlgan.
