Shiran xatoga yoʻl qoʻyganini aytdi va Yaqin Sharqdagi mojaro yuzasidan munosabat bildirdi.
«Men hech qachon aktivist-musiqachi boʻlishni xohlamaganman, ammo bu vaziyat tufayli soʻz erkinligi va sayyoradagi eng murakkab siyosiy masala haqidagi muhim va qizgʻin bahs markaziga tushib qoldim», – dedi Shiran Filadelfiyadagi konserti avvalida.
Loop Tour’ning 4-sentabr kuni Nyu Jersida oʻtkazilgan birinchi konsertida davrani qizitish uchun sahnaga chiqqan amerikalik reper Macklemore «Falastinga ozodlik!» deya hayqirgandi.
U 2024-yilda Isroil harbiylarining Gʻazo sektoriga hujumi paytida halok boʻlgan besh yoshli qizaloq xotirasiga bagʻishlangan Hind's Hall nomli qoʻshigʻi taqdimoti vaqtida ham shunday yoʻl tutgandi. Ushbu qoʻshigʻi orqali musiqachi Kolumbiya universitetida Isroilning harakatlariga qarshi norozilik bildirgan talabalarni ham qoʻllab-quvvatlagandi.
5-sentabr kungi konsertda esa Macklemore yahudiy muxlislarga murojaat qilib, «Isroil va aparteidni tanqid qilish, genotsidga norozilik bildirish – barcha yahudiylarni tanqid qilish emasligi»ni aytadi.
Isroil hukumati bir necha marta Gʻazodagi aparteid va genotsid uyushtirish boʻyicha ayblovlarni rad etgan.
Reperning oʻzini tutishi Isroilni qoʻllovchi guruhlar tanqidini keltirib chiqardi, jumladan, Macklemore’ni tur doirasidagi keyingi konsertlardan chetlatish talabi bilan petitsiya uyushtirildi.
Shundan keyin Macklemore’ning tur doirasidagi chiqishlari bekor qilindi, milliarder Robert Kraft esa oʻziga tegishli boʻlgan stadionda ushbu reperning qoʻshiq kuylashiga yoʻl qoʻymaslikni talab qildi.
Amerika yahudiylar jamoasiga mansub boʻlgan va Isroilni qoʻllab-quvvatlovchi Kraft reperni nafrat uygʻotishda aybladi. U qoʻshiqchi «faqat tanlab olingan maʼlumotlarni tarqatishi va Hamas harakatlarini eʼtiborsiz qoldirishi»ni taʼkidlagan.
Mojaro davomi: Shiran yana nimalar dedi?
Shundan soʻng, Shiranning konsertlarini qizdirish uchun jalb etilgan barcha sanʼatkorlar reper bilan birdamlik ifodasi sifatida gastrolda ishtirok etishdan bosh tortdi.
Bu mojaro natijasida Shiranning AQSH boʻylab gastrolining qolgan qismiga qiziqish pasaydi, narxi arzonlashtirilganiga qaramay, chiptalar sotilmay qoldi.
