Avstraliya bosh vaziri Entoni Albaniz OpenAI kompaniyasining sunʼiy intellekt agentlari Avstraliyaning milliy sogʻliqni saqlash maʼlumotlar bazasini buzib kirganini maʼlum qildi. Mutaxassislarning taʼkidlashicha, bu agentlarning vazifani bajarish paytida davlat idorasi tizimlariga noqonuniy kirishi bilan bogʻliq dunyodagi birinchi maʼlum holatdir.
Buzib kirish iyun oyida sodir boʻlgan. Ichki sinovlar paytida agent kirish cheklovlaridan oʻtgan va tibbiyot xarajatlarini oʻrganish uchun materiallar qidirish maqsadida Avstraliya davlat sogʻliqni saqlash tizimi maʼlumotlar bazasining yopiq qismiga kirgan.
OpenAI voqea haqida avgust oyida xabar topdi. Kompaniya Avstraliya rasmiylariga elektron pochta orqali xabarnoma yuborgan, biroq u faqat 11-sentabrdagina oʻqilgan. 22-sentabr kuni Avstraliya OpenAI kompaniyasidan hodisa tafsilotlarini taqdim etishni soʻradi. Mamlakat bosh vaziri bunday muloqot usulini «nomaqbul» deb atadi.
OpenAI sunʼiy intellekt agenti Avstraliyaning Medicare tizimining yopiq boʻlimlariga, shuningdek, sogʻliqni saqlash va statistika bilan bogʻliq yana bir qancha davlat tashkilotlari tizimlariga kirishga muvaffaq boʻlgan.
Hozircha odamlarning shaxsiy tibbiy maʼlumotlariga ziyon yetmagan va hodisa «nisbatan ahamiyatsiz» deb hisoblanmoqda. Avstraliya hukumati oʻz tergovini davom ettirmoqda, bosh vazir Albaniz OpenAI rahbari Sem Altman bilan sodir boʻlgan voqeani allaqachon muhokama qilgan.
