DW nashrining Politicoʻga tayanib xabar berishicha, sud qarori haqida 1-oktabr, payshanba kuni maʼlum qilingan. Qaror Vashington shtatining Gʻarbiy okrugi federal prokurori lavozimidan boʻshatilgan Rojer Rogoffning daʼvosi asosida qabul qilingan.
Okrug sudi Rogoffni mazkur lavozimga tayinlaganidan koʻp oʻtmay, Tramp uni ishdan olgan va oʻrniga oʻziga sodiq Charlz Nil Floydni qoʻygan.
Sud: Rogoff hamon prokuror
Sudya Bastianning taʼkidlashicha, bunday almashtirishlar Konstitutsiya va qonunlarda belgilangan tizimni buzadi. Ushbu tizim prezidentning mansabdorlarni tayinlash huquqi hamda Senatning nomzodlarni tasdiqlash vakolati oʻrtasidagi muvozanatni taʼminlaydi.
Sud Rogoff 15-iyul kuni qasamyod qabul qilganidan buyon federal prokuror lavozimini qonuniy ravishda egallab kelayotganini qayd etdi. Prezident maʼmuriyati uning oʻrniga belgilangan tartibga zid ravishda tayinlagan Floyd esa bu lavozim vakolatlariga ega emas, deb topildi.
Bastian, shuningdek, AQSH bosh prokurori Todd Blansh va Adliya vazirligiga Rogoffni ishdan boʻshatilgan yoki lavozimidan chetlatilgan deb hisoblashni, uning xizmat vazifalarini bajarishiga toʻsqinlik qilishni taqiqladi. Ular mazkur okrug prokurori sifatida Rogoffdan boshqa shaxsni tan olmasligi kerak.
Adliya vazirligi qaror ustidan shikoyat qilishini va apellyatsiya koʻrib chiqilayotgan vaqtda uning ijrosini toʻxtatib turishni soʻrashini bildirdi.
Tramp maʼmuriyati Senat tasdigʻini chetlab oʻtishga uringan
Politicoʻning yozishicha, Tramp maʼmuriyati prezidentga sodiq shaxslarni yuqori lavozimlarga tayinlash uchun Senat tasdigʻidan oʻtish tartibini bir necha bor chetlab oʻtishga harakat qilgan.
Okrug sudyalari oʻz vakolatlaridan foydalanib, federal prokuror lavozimiga boshqa nomzodni tanlagan holatlarda Tramp oʻsha shaxsni ishdan boʻshatgan, deya qayd etadi nashr.
AQShda federal prokurorlar qanday tayinlanadi?
Xabarda keltirilgan tartibga koʻra, federal prokurorlikka nomzodni AQSH prezidenti ilgari suradi, Senat esa uni tasdiqlaydi.
