Gazlashmagan hududlarda isitish mavsumida elektrning bazaviy limiti oshiriladi. Toshkent davlat texnika universitetining yuzlab talabalari kechasi koʻchaga haydaldi. Centrum Air aviakompaniyasi styuardessadan oʻzbek tilida gapirishni soʻragan yoʻlovchini samolyotdan tushirib yubordi. Oʻzbekistonda oʻlat bilan bogʻliq epidemiologik vaziyat barqarorligi aytildi. Kunning muhim yangiliklari bilan tanishtiramiz.
Gazlashmagan hududlarda isitish mavsumida elektrning bazaviy limiti oshiriladi
Prezident Shavkat Mirziyoyev kuz-qish mavsumida aholini, ayniqsa, ehtiyojmand oilalarni ijtimoiy himoya qilish boʻyicha takliflar taqdimoti bilan tanishdi.
Taqdimotda isitish mavsumida gazlashmagan hamda gaz yetib bormagan hududlarda elektr energiyasi boʻyicha bazaviy meyorni 200 kilovatt-soatdan 350 kilovatt-soatga oshirish taklifi maʼqullandi.
Dekabr oyida ehtiyojmand oilalarga bir martalik moddiy yordam ajratish masalasini koʻrib chiqish, ijtimoiy reyestrga kirmagan ehtiyojmand oilalarning elektr energiyasi, gaz, koʻmir va kommunal xizmatlar xarajatlarini qoplashda oilaning har bir aʼzosiga qoʻllanadigan daromad mezonini 1 million 430 ming soʻmgacha oshirish masalasi ham koʻrib chiqildi.
Toshkent davlat texnika universitetining yuzlab talabalari kechasi koʻchaga haydaldi
Toshkent davlat texnika universiteti talabalari Kun.uz'ga murojaat etib, 6-oktabr kechki payt yotoqxonadan chiqarib yuborilgani boʻyicha shikoyat qilishdi. Maʼlum boʻlishicha, ular universitet huzurida davlat-xususiy sheriklik asosida qurilgan yangi yotoqxonada toʻlovni amalga oshirgan holda yashagan. Ammo universitet prorektori, prokuratura xodimi va uchastka inspektori yotoqxonani boʻshatish kerakligini aytgan.
Taʼlim va ilm-fan vazirligi bergan izohga koʻra, ushbu yotoqxona hozircha rasman foydalanishga topshirilmagan, kadastr hujjatlari rasmiylashtirilmagan hamda undan foydalanish uchun ruxsat olinmagan. Shu sababli obyektga talabalarni rasmiy tartibda joylashtirish imkoni mavjud emas. Qayd qilinishicha, talabalar mazkur yotoqxonaga belgilangan tartibga rioya etmagan holda tadbirkor tomonidan joylashtirilgan. Bu haqda universitet ham, vazirlik ham oldindan xabardor boʻlmagani aytilmoqda. Holat aniqlanganidan soʻng talabalarning xavfsizligi va qonuniy manfaatlarini taʼminlash maqsadida tegishli choralar koʻrilgan. Taʼkidlanishicha, mazkur binoga joylashtirilgan talabalardan undirilgan toʻlovlar tadbirkor tomonidan toʻliq qaytarib berilgan.
Centrum Air aviakompaniyasi styuardessadan oʻzbek tilida gapirishni soʻragan yoʻlovchini samolyotdan tushirib yubordi
Centrum Air aviakompaniyasining 5-oktabr kuni Samaradan (Rossiya) Toshkentga uchadigan reysida styuardessa va yoʻlovchi oʻrtasida kelishmovchilik yuz berdi. Oʻziga oʻzbek tilida murojaat qilishni soʻragan yoʻlovchi samolyotdan tushirib yuborildi.
Komil ismli fuqaro Samaradan Toshkentga uchadigan reysga chiqarilmagani yuzasidan ijtimoiy tarmoqda video joylashtirdi. Uning aytishicha, styuardessadan oʻzbekcha gapirishni soʻraganidan keyin, u havo kemasi komandiri bilan gaplashgan va yoʻlovchini reysdan tushirib yuborgan. Oqibatda u boshqa reys bilan Oʻzbekistonga qaytgan.
Centrum Air aviakompaniyasi bergan izohga koʻra, barcha bort kuzatuvchilar oʻzbek, rus va ingliz tillarini biladi hamda yoʻlovchilar bilan qulay tilda muloqot qiladi. Taʼkidlanishicha, Samara-Toshkent reysi yoʻlovchisi bort kuzatuvchisiga nisbatan tajovuzkor munosabatda boʻlgan, ishga xalaqit bergan, shu sababli havo kemasi komandiri yoʻlovchini parvozga qoʻymaslik toʻgʻrisida qaror qabul qilgan. Kompaniya ushbu qarorni toʻliq asosli deb hisoblamoqda.
Hodisa ijtimoiy tarmoqlarda shov-shuvga sabab boʻlgach, Centrum Air bosh direktorining birinchi oʻrinbosari Maʼmurjon Madaliyev holatga izoh berdi. U bort kuzatuvchi nohaq ekani, yoʻlovchining barcha transfer xarajatlari aviakompaniya tomonidan toʻliq qoplab berilishini maʼlum qildi.
Oʻzbekistonda oʻlat bilan bogʻliq epidemiologik vaziyat barqarorligi aytildi
Rossiyaning Irkutsk shahrida oʻlat kasalligiga gumon holati qayd etilgani haqida xabarlar tarqalgach, Sanepidqoʻm vakili Oʻzbekistonga shu kabi xavfli yuqumli kasalliklar kirib kelishining oldini olish borasida qanday profilaktik choralar koʻrilganini maʼlum qildi.
«Avvalo shuni aytish kerakki, mamlakatimizda oʻlat kasalligi bilan bogʻliq epidemiologik vaziyat barqaror va xavotirlanishga hech qanday asos yoʻq», dedi Sanitariya-epidemiologik osoyishtalik va jamoat salomatligi qoʻmitasi raisining birinchi oʻrinbosari Nurmat Otabekov.
Uning taʼkidlashicha, Oʻzbekistonda shu va boshqa oʻta xavfli yuqumli kasalliklarning chetdan kirib kelishi va tarqalishining oldini olishga qaratilgan zarur chora-tadbirlar tizimi yaratilgan. Xususan, ayni paytda davlat chegaralarini kesib oʻtish joylarida (xalqaro aeroportlar, temiryoʻl stansiyalari, avtomobil yoʻllarida) 53 ta sanitariya nazorat punkti faoliyat yuritmoqda. Ular orqali xorijdan kirib kelayotgan shaxslar doimiy tibbiy kuzatuvdan oʻtkaziladi.
