2026-yilda Yevropa va Markaziy Osiyo mintaqasining rivojlanayotgan davlatlarida iqtisodiy oʻsish 2025-yildagi 2,6 foizdan 2,2 foizgacha sekinlashadi, bunga energiya narxlarining oshishi, geosiyosiy keskinlik va savdo hamkorlaridan kelayotgan talabning zaiflashuvi sabab boʻlishi mumkin. Bu haqda Jahon bankining «Sunʼiy intellektni qanday ishga solish kerak: ish oʻrinlari, kompaniyalar va unumdorlik» hisobotida keltirilgan.

Markaziy Osiyo eng tez oʻsuvchi submintaqa boʻlib qolmoqda. 2026-yilda ushbu hududda oʻsish 5,8 foizni tashkil qilishi kutilmoqda. Bunda barqaror ichki talab va transport hamda energetikaga yoʻnaltirilgan davlat investitsiyalari hisobga olingan.

Oʻzbekistonda real YAIM oʻsishi 2025-yilda 7,7 foizni tashkil etdi, 2026-yilda esa 7,9 foizgacha tezlashishi kutilmoqda - bu mintaqadagi eng yuqori prognoz. Iqtisodiy yuksalish barqaror ichki talab, real ish haqining oʻsishi, bandlikning ortishi, pul oʻtkazmalarining koʻpayishi va davom etayotgan tarkibiy islohotlar bilan bogʻliq.

Xususan, 2026-yilning birinchi yarmida pul oʻtkazmalari hajmi 13 foizga oshib, rekord daraja - 9,2 milliard dollarga yetgan. Bunda barcha oʻtkazmalarning 70 foizi Rossiyadan yuborilgan. Oltin hisobga olinmaganda eksport Xitoy va qoʻshni Markaziy Osiyo mamlakatlari bilan savdoning kengayishi tufayli qariyb 30 foizga oshgan.
Hisobotning sunʼiy intellektga bagʻishlangan maxsus boʻlimida taʼkidlanishicha, SI mintaqa uni oʻzlashtirishga ulgurayotganidan tezroq tarqalyapti. Har besh ishchidan biri, asosan yosh va yuqori maʼlumotlilar, SI sezilarli darajada taʼsir koʻrsatadigan kasblarda ishlaydi. Biroq hozirda faqatgina oʻnta korxonadan biri uni oddiy vazifalarni bajarish uchun ishlatmoqda.

Maʼlumot uchun, Jahon bankining aprel oyidagi hisobotida Oʻzbekistondagi iqtisodiy oʻsish 2026-yilda 6,4 foizni tashkil etishi keltirilgandi.