Aholiga suyultirilgan gaz yetkazib berishda davlat monopoliyasi tugatiladi
2027-yilda suyultirilgan gaz yetkazib berish sohasini respublika boʻylab xususiy sektorga berish maqsad qilingan. Bu haqda Shavkat Mirziyoyev yoqilgʻi-energetika sohasidagi investorlar bilan oʻtkazilayotgan ochiq muloqotda maʼlum qildi.
Taʼkidlanishicha, hozir mamlakatda 3 million 800 ming xonadon suyultirilgan gazdan foydalanmoqda. Ilgari davlat monopoliyasida boʻlgan ushbu taʼminot tizimiga bosqichma-bosqich bozor mexanizmlari joriy etilmoqda.
Xususan, tadbirkorlar ishtirokidagi pilot loyiha Andijon viloyatida boshlangan. Kelgusi yilda mazkur amaliyotni butun respublika boʻylab kengaytirish rejalashtirilgan. Prezident bu jarayonda gaz taʼminotining uzluksizligi, xavfsizlik va aholiga xizmat koʻrsatish sifati eng muhim mezonlar boʻlishini taʼkidladi.
Peshlavhani reklamaga tenglashtirish rasman toʻxtatildi
Toshkent shahrida koʻplab tadbirkorlarning noroziligini uygʻotgan peshlavha muammosi yuzasidan qonunchilikka oʻzgartirish kiritildi. Bu haqda Raqobat qoʻmitasi xabar berdi.
Vazirlar Mahkamasining 13-oktabrdagi qaroriga asosan, bundan buyon tadbirkorlik subyekti oʻzi egallab turgan bino yoki inshootning tashqi tomonida (kirish joyida) joylashtirgan nomi va faoliyat turi (ixtisosligi) toʻgʻrisidagi axborot (peshlavha) shu jumladan, firma nomi, tovar yoki xizmat koʻrsatish belgisi, tashqi reklama obyekti hisoblanmaydi hamda ushbu axborot vositasi uchun reklama joyining pasportini rasmiylashtirish talab etilmaydi.
Oliy taʼlimda kontrakt toʻlash muddati 1-noyabrgacha uzaytirildi
2026-2027 oʻquv yili uchun oliy taʼlim tashkilotlarida kontrakt toʻlovlarini amalga oshirish va talabalikka qabulni rasmiylashtirish muddati 1-noyabrga qadar uzaytirildi. Shu sanagacha bazaviy kontrakt yillik qiymatining kamida 25 foizi, tabaqalashtirilgan kontraktning esa kamida 50 foizi toʻlanishi lozim.
Uzaytirilgan muddat bakalavriat va magistraturaga oʻqishga tavsiya etilgan abituriyentlar, oʻqishi koʻchirilgan, koʻchirib tiklangan hamda oʻqishga qayta tiklangan talabalarga taalluqli.
Oʻzbekistonda tugʻilish soni ketma-ket ikki yil kamaydi
Milliy statistika qoʻmitasi maʼlumotlariga koʻra, 2024-yilda mamlakatda 926,4 mingta tugʻilish qayd etilgan. 2025-yilda bu koʻrsatkich yana 46,8 mingtaga, yaʼni qariyb 5,1 foizga qisqargan.
Uzoq muddatli maʼlumotlar tugʻilish soni dastlab kamayib, keyin oʻsganini koʻrsatadi. Jumladan, 1991-yilda 723,4 ming nafar bola tugʻilgan boʻlsa, 2000-yilda bu koʻrsatkich 527,6 ming nafarni tashkil etgan. 2015-yilga kelib esa 734,1 ming nafarga yetgan.
2026-yilning yanvar–iyun oylarida esa 373,4 mingta tugʻilish qayd etilgan. Bu yarim yillik maʼlumot boʻlgani uchun uni avvalgi yillarning toʻliq yillik koʻrsatkichlari bilan bevosita taqqoslab boʻlmaydi.
Erta nikoh uchun jarimalar oshirildi
Prezident Shavkat Mirziyoyev tomonidan 14-oktabr kuni imzolagan qonun bilan Maʼmuriy javobgarlik toʻgʻrisidagi kodeksga (47.3-moddasi) oʻzgartirishlar kiritildi.
Jumladan, endi nikoh yoshiga yetmagan shaxs bilan haqiqiy nikoh munosabatlariga kirishish bazaviy hisoblash miqdorining (BHM) 10 baravaridan 15 baravarigacha - 4,4 million soʻmdan 6,6 million soʻmgacha jarima solishga sabab boʻladi. Ilgari eng yuqori jazo chorasi BHM 10 baravarini tashkil etar edi.
Shuningdek, voyaga yetmagan fuqarolarni turmushga berganlik yoki uylantirganlik uchun ham jarimalar oshdi. Yangi qonun qabul qilingunga qadar aybdorlar BHM 15 baravarigacha boʻlgan miqdorda jarimaga tortilishi mumkin edi, endi esa BHM 20 baravaridan 25 baravarigacha - 8,8 million soʻmdan 11 million soʻmgacha oraliqda jarima belgilandi.
Nihoyat, FHDYoda tegishli tartibda qayd ettirmay diniy marosim (sharʼiy nikoh) oʻtkazganlik, jumladan, 18 yoshga toʻlmagan fuqarolar oʻrtasida shunday nikoh tuzganlik uchun BHM 30–50 baravari miqdorida - 13,2 million soʻmdan 22 million soʻmgacha moliyaviy jazo koʻzda tutilgan. Ilgari bu jarima bazaviy hisoblash miqdorining 30 baravaridan oshmas edi.
Toshkentda issiq suvdan badboʻy hid kelayotgani yuzasidan tekshiruv boshlandi
Veolia Energy Tashkent kompaniyasiga Toshkent shahrining beshta tumani aholisidan issiq suv sifati yuzasidan shikoyatlar kelib tushayotgani maʼlum boʻldi.
Kompaniya maʼlumotiga koʻra, mazkur tumanlarga tarmoq suvi tashqi yetkazib beruvchi - «Toshkent issiqlik elektr markazi» AJ tomonidan uzatiladi. Veolia Energy Tashkent esa issiqlik energiyasi va issiq suvni turar joy binolarining yertoʻla qismigacha yetkazib berish va taqsimlash bilan shugʻullanadi.
Murojaatlardan soʻng kompaniyaning akkreditatsiyadan oʻtgan laboratoriyasi mutaxassislari joylarga chiqib, suv manbalari va xonadonlardan namunalar olgan. Ular kimyoviy-bakteriologik hamda organoleptik tahlillardan oʻtkaziladi. Tekshiruv natijalari tekshiruv yakunlangach eʼlon qilinadi.
