Manba: Navoiy viloyati hokimi ishdan olingan

Navoiy viloyati hokimi Qobul Tursunov vazifasidan ozod etilgan. Ushbu lavozimni Xalq banki boshqaruvi raisi vazifasida faoliyat yuritib kelgan Shuhrat Atabayev egallashi kutilmoqda.

Foto: Kun.uz

Bugun xalq deputatlari Navoiy viloyati kengashining navbatdan tashqari sessiyasi bo‘lib o‘tadi. Unda tashkiliy masala ko‘rib chiqiladi.

Kun.uz manbasiga ko‘ra, sessiyada Navoiy viloyati hokimi lavozimida ishlab kelgan Qobul Tursunov vazifasidan ozod qilinishi va uning o‘rniga Xalq banki boshqaruvi raisi lavozimida faoliyat yuritib kelgan Shuhrat Atabayev yangi hokim etib tasdiqlanishi kutilmoqda.

Qobul Tursunovning lavozimdan olinish sababi hozircha ma'lum emas. U 2016 yil 25 dekabrdan beri Navoiy viloyati hokimi vazifasida ishlab kelayotgandi.

Oldinroq Argos.uz portalida O‘zbekistondagi barcha hokimlarning faoliyati samaradorligini aks ettiruvchi reyting natijalari e'lon qilinib, unda viloyatlar bo‘yicha aynan Navoiy viloyati eng yuqori ko‘rsatkichni qayd etgandi.

Tayyorlagan: Азиз Қаршиев

#Navoiy viloyati #Shuhrat Atabayev #Qobul Tursunov