«Inter» himoyasi Madridda tomosha koʻrsatdi, Holandda gʻayrioddiy natija. Kun oʻyinlari
|11:0513 36414 min
Seshanba oqshomida Chempionlar ligasi umumiy guruh bosqichida dastlabki oltita oʻyin boʻlib oʻtdi.
Kilian Mbappe golni Valverde bilan nishonlamoqda. Foto: Dennis Agyeman/Europa Press via Getty ImagesKilian Mbappe golni Valverde bilan nishonlamoqda. Foto: Dennis Agyeman/Europa Press via Getty Images
«Real» «Inter» himoyasini qoʻpol xatolar uchun kechirmadi – 2:1. Joze Mourinio sobiq jamoasi ustidan gʻalaba qozondi.
«Inter» futbolchilari «Bernabeu»da tom maʼnoda dovdirashdi va jamoa oʻyini raqib pressingi ostida sochilib ketdi. 14-daqiqada Kertis Jons jarima maydoni yaqinida toʻpni oldirdi, Braim Dias esa vaziyatdan foydalanib, darhol uning ortida boʻsh turgan Kilian Mbappeni toʻp bilan taʼminladi. Fransuz hujumchisi esa bunday imkoniyatni qoʻldan boy bermaydi.
Milanliklar 23-daqiqada ham yana bir gol sovgʻa qilishdi: darvozabon Jozep Martines negadir fint ishlatishga qaror qildi, undan toʻpni olib qoʻygan Fede Valverde esa hisobni 2:0 koʻrinishiga keltirdi.
Milanliklar 77-daqiqada bitta gol bilan javob qaytarishdi: Karlos Augusto Lautaro Martines qanotdan oshirgan toʻpni Kurtua qoʻriqlayotgan darvozaga joylab qoʻydi. Ammo «Real»ga birinchi boʻlimda urilgan gollar gʻalaba uchun yetarli boʻldi.
Bu oqshom 27 yoshli Kilian Mbappe YECHL tarixidagi eng yaxshi toʻpurarlar beshligiga kirishga ulgurdi. Ushbu fransuz 99 oʻyinda 71 gol urgan – u shuncha golni 142 oʻyinda urgan Raulga yetib oldi. Keyingi maqsad – «Real»ning yana bir afsonasi, 90 golga ega Karim Benzemaga yetib olish.
«Inter» esa shu kuni mavsumda ilk bor ochko yoʻqotdi. Bungacha jamoa A Seriyada uch oʻyindan iborat gʻalabali seriya qayd etayotgandi.
Joze Mourinio «Inter»ga qarshi oʻyinlardagi statistikasini yaxshiladi. Bungacha u «Roma» bosh murabbiyi sifatida ushbu sobiq jamoasiga qarshi olti oʻyinda besh marta yutqazgan, bir marta durang oʻynagandi.
Mavzuga oid
«Real» keyingi turda ham A Seriya vakiliga qarshi oʻynaydi – Joze Mourinioning yana bir sobiq jamoasi «Roma»ga qarshi safarda. «Inter» esa oʻz uyida «Bryugge»ni qabul qiladi.
«Portu» oʻz uyida istalgan raqibning hayotini qiyinlashtira oladi va «ajdarlar» ilk daqiqalardanoq «Manchester Siti» himoyasini ham tezkor hujumlari bilan sinovdan oʻtkaza boshladi. Shu bilan birga, oʻz darvozasi qarshisida ham xavfli vaziyatlarga yoʻl qoʻydi. Avvaliga Foden toʻpni Holandning boshiga yetkazib berdi va Diogu Koshta toʻsin ostiga kirib ketayotgan toʻpni toʻsib qoldi. Keyin esa ushbu darvozabon Fodenning jarima maydoni tashqarisidan yoʻllagan xavfli zarbasini bartaraf etdi. Boʻlim davomida bir hujumning oʻzida Holand va Sherkining zarbalarini ham qaytardi.
Enso Mareska jamoasiga bu hujumlarda omad yetishmadi, ammo boʻlim oxirida inglizlarning ham omadi keldi: mehmonlar son jihatdan ozchilik boʻlib qolishi mumkin edi, ammo oʻyin bosh hakami raqibining boshiga ochiqchasiga tirsak bilan zarba bergan Geyiga sariq kartochka ham koʻrsatmadi.
Ikkinchi boʻlim esa Koshta taslim boʻlishi bilan boshlandi. Sherki maydon tashqarisiga chiqib ketayotgan toʻpni olib qoldi va uni Fernandesga yetkazdi, Enso esa toʻpni Holandning boshiga yetkazib berdi va hisob ochildi.
«Portu» ikkinchi boʻlim davomida hisobni tenglashtirishga yaqin kelgandi. Himoyachilar Donnarummaga noqulay pas berishgandi, ammo uning baxtiga Gomesning zarbasidan keyin toʻp ustun yonidan oʻtib ketdi.
Oʻyinga qoʻshib berilgan daqiqalarda Erling dublni rasmiylashtirib, asosiy yevrokubokdagi 59 uchrashuvda 59 gol urgan holda, aqlbovar qilmas natija qayd etdi. Bundan tashqari, norvegiyalik hujumchi Tomas Myullerni ortda qoldirgan holda, turnir tarixidagi eng yaxshi toʻpurarlar roʻyxatida yettinchi oʻringa koʻtarildi. Oʻyin yanada yirik hisobda yakunlanishi mumkin edi, ammo portugaliyaliklar posboni seyv ijro etishda davom etdi (jami 8 ta seyv) va uning qahramonliklari guruh bosqichi yakunida, toʻplar nisbati hisoblanayotganda «Portu»ga qoʻl kelishi mumkin.
«Siti» keyingi turda «Etihad»da «PSJ»ga qarshi supermatch oʻtkazadi, «Portu» esa «Betis» mehmoni boʻladi.
Bu mavsum startida «Borussiya»ning omadi kelmayapti: dortmundliklar bir yarim hafta ichida yozda jami 56 mln yevro sarflab sotib olingan ikki futbolchisi jiddiy jarohat oldi. Bundesliganing birinchi turida Konstantelias xochsimon bogʻlamlari uzilishi tufayli safdan chiqqandi, seshanba oqshomidagi oʻyinning birinchi boʻlimi oʻrtalarida esa gretsiyalik boshqa bir isteʼdodli futbolchi Karetsas maydonni zambilda tark etdi. Qolaversa, u darvozabon Kobelga ham tibbiy yordam koʻrsatishga toʻgʻri keldi, ammo u maydonda qoldi.
Birinchi boʻlimdagi yagona xavfli vaziyat «asalarilar»da boʻldi. Ammo Girassi Bayerning olis ustun tomon yoʻllagan uzatmasiga yetib bora olmadi. Ikkinchi boʻlim esa Nvanerining zarbasi ustunga borishi bilan boshlandi, mezbonlar hujumkor oʻynashda davom etishdi va Bayerning qanotdan uzatmasi Renatu Veyganing avtogoliga sabab boʻldi. Ammo oʻtkazib yuborilgan gol ispanlarni uygʻotdi. Mehmonlar ketma-ket hujumlar uyushtirishdi, avvaliga Oluvaseyi va Pepe xavfli zarbalar yoʻlladi, Santiyago Mourinio esa baribir hisobni tenglashtirdi.
Ammo shundan keyin shu kuni «Borussiya» safida 100-uchrashuvini oʻtkazayotgan Girassi katta maydonga chiqdi. U Fabiu Silvaning pasidan boʻsh darvozani ishgʻol etish bilan boshladi. Keyin esa oʻzi ishlagan penaltini aniq ijro etib, oradagi farqni oshirdi. Oʻyinga qoʻshib berilgan daqiqalar esa dramatik tarzda kechdi. Avvaliga Girassi oʻyindagi uchinchi golini urdi, ammo bu safar oʻz jamoasi darvozasiga. Oʻyin yakunlanishi arafasida Veyga avtogol uchun aybini yuvishi mumkin edi, ammo portugaliyalik himoyachi qulay vaziyatdan foydalana olmadi va mezbonlar gʻalabani saqlab qolishdi.
Keyingi turda «Borussiya» shimolga, «Budyo-Glimt» maydoniga safar qiladi, «Vilyarreal» uyda «Napoli» bilan oʻynaydi.
Bahorda «Aston Villa» sensatsion ravishda 1/8 finalga chiqqan «Bryugge»ni osonlik bilan ortda qoldirgandi (3:1, 3:0). Bu safar tarkibi yangilangan holda Belgiyaga tashrif buyurgan birminghemliklar yangi mavsumdagi ilk gʻalabasiga erishdi va toʻrtinchi uchrashuvga kelib gollar hisobini ochishdi. Markaziy himoyachi Pau Torres toʻpni jarima maydoniga qadar olib bordi va Makginni golli pas bilan taʼminladi. Endi shotlandiyalik yarimhimoyachi 12 gol bilan «Villa»ning yevrokuboklardagi eng yaxshi toʻpurariga aylandi.
Unai Emeri muvaffaqiyatni rivojlantirib, hisobni yiriklashtirib qoʻyishi mumkin edi. Ammo avvaliga Yan Zommer Hemmingsning yaqin masofadan yoʻllagan zarbasini qaytardi. Inglizlarning ketma-ket hujumlaridan omon chiqqan «Bryugge» ham hujumga oʻtdi va Virjili Vetlesenni golli pas bilan taʼminladi. Ammo mezbonlarning quvonchi uzoqqa choʻzilmadi – hisob tenglashganidan uch daqiqa oʻtganida Joao Gomes himoyachini aldab oʻtib, Buendiyani golli pas bilan taʼminladi.
Keyin esa Zommer asabiylasha boshladi. Birinchi holatda u hujum boshlashga shoshilib, toʻpni raqibga oldirdi va xavfli masofada jarima zarbasi belgilandi. Keyingi epizodda esa u himoyachilarni sugʻurtalash uchun jarima maydonini tashlab chiqdi, toʻpga birinchi boʻlib yetib kelgan Jekson esa boʻsh darvozani ishgʻol etib, amalda oʻyin taqdirini hal qildi – 1:3.
Ikkinchi boʻlimda Van-Bissaka jarima maydoni ichida toʻpni qoʻli bilan oʻynadi va Tresoldi 11 metrdan aniq zarba berib, hisobni qisqartirdi. Ammo oʻyinning qolgan qismida «Villa» gʻalabali hisobni ushlab qoldi.
Keyingi turda «Villa» «Fenerbahche»ni qabul qiladi, belgiyaliklar «Inter» mehmoni boʻladi.
Lilldagi oʻyin umumiy guruh bosqichidagi eng yosh va eng tajribali murabbiylarning dueliga aylandi – 37 yoshli Davide Anchelotti 72 yoshli Manuel Pellegriniga qarshi. Mehmonlar avvaliga himoyalanishga majbur boʻlishdi, ammo baribir gol oʻtkazib yuborishdi. Fransuzlar jamoasi yozgi transferlar oynasining soʻnggi kunida «Feyenoord»dan sotib olgan Ueda Itan Mbappening ajoyib uzatmasini golga aylantirdi. Yaponiyalik hujumchi bu vaziyatda darvozabon hududida turib toʻpga shunchaki boshi bilan teginib qoʻyishi yetarli edi. Kilianning ukasi uchun bu YeChLdagi ilk golli pas boʻldi.
Shundan keyin «Betis» ham faollashdi va burchak toʻpi ishlandi. Pablo Fornals toʻpni havolatib jarima maydoniga oshirdi, Bartra boshi bilan toʻpni darvozaga qadab qoʻydi. Bu sevilyaliklar jamoasining YeChLda 20 yil-u 311 kundan buyon urgan ilk goliga aylandi.
Uch daqiqa oʻtib mezbonlar ham burchak toʻpidan unumli foydalanishdi. Perren toʻpni Aleksandro tashlab berdi, u esa toʻpni olis toʻqqizlik tomon yoʻnaltirdi – 2:1.
Ikkinchi boʻlim boshida esa Bartra dubl muallifiga aylandi. U bu safar Isko jarima zarbasidan oshirgan toʻpni bosh bilan mezbonlar darvozasiga yoʻlladi. Bir necha daqiqa oʻtib esa Perrott mehmonlarni oldinga olib chiqdi – 2:3.
Uch daqiqa oʻtib Mbappe oʻyin antiqahramoniga aylandi. Ispanlar futbolchisi Natan uning oldidan oʻtayotib, yelkasiga qoqib qoʻydi, Itan esa uning yuziga tirsak bilan zarba berdi. VAR zamonida esa bunday harakat ahmoqlik, bu harakat amalda oʻyin taqdirini hal qildi – mezbonlar ozchilik boʻlib qolgach, hisobni tenglashtirish uchun ham kuch topa olmadi.
«Lill»ni keyingi turda «Arsenal»ga qarshi qiyin safar kutmoqda, «Betis» «Portu»ni qabul qiladi.
Greklar klubi sakkiz yildan buyon YECHL asosiy bosqichida qatnashmayotgandi. Jamoaga Marko Nikolich taklif etilishi esa barchasini oʻzgartirdi. U avvaliga AYeKni Konferensiyalar ligasi chorakfinaliga olib chiqqandi, endi esa asosiy yevrokubokni gʻalaba bilan boshladi. Avstriya chempioni va turnir debyutanti hisoblangan LASK greklar bilan zarbalar almashinuviga kirishdi (zarbalar soni mezbonlar foydasiga 18:11). Lekin bu zarbalardan faqat bittasi golga aylandi – 21-daqiqada AEK yarimhimoyachisi Marin tomonidan jarima zarbasi orqali urilgan gol yagonaligini saqlab qoldi.
Ikkinchi boʻlim oʻrtalarida «Real» va «Milan»ning sobiq hujumchisi Yovich mehmonlar darvozasini yana bir bor ishgʻol etgandi. Ammo bu hujum vaqtida Mayer ofsaydga kirib qolgani tufayli gol bekor qilindi. Oʻyin oxirida Kalayjich hisobni tenglashtirishga yaqin edi, ammo u boʻsh darvoza qarshisida turib bosh bilan yoʻllagan zarbadan keyin toʻp toʻsin yuqorisidan oʻtib ketdi.
AEK keyingi turni Londonda «Shaxtyor» bilan oʻtkazadi va startdagi ikki turda 6 ochko jamgʻarish uchun yaxshi imkoniyatga ega. LASK esa uyda «Liverpul» bilan oʻynaydi.
