Respublika Ma’naviyat va ma’rifat markazi rahbari ishdan ketdi

Respublika Ma’naviyat va ma’rifat markazi rahbari Minhojiddin Mirzajanovich Hojimatov (Minhojiddin Mirzo) boshqa ishga o‘tishi munosabati bilan lavozimidan ozod qilindi.

U Yozuvchilar uyushmasi raisining ijodiy masalalar bo‘yicha birinchi o‘rinbosari lavozimiga tayinlandi.

Shoir va jurnalist Minhojiddin Mirzo 1965 yilda tug‘ilgan, 1990 yilda Toshkent davlat universiteti Jurnalistika fakultetini tamomlagan. 2013–2014 yillarda O‘zbekiston madaniyat va sport vaziri bo‘lgan. 2012–2013 yillarda Milliy teleradiokompaniya raisining birinchi o‘rinbosari sifatida ishlagan. 2018 yilda Yozuvchilar uyushmasi raisi o‘rinbosarligiga o‘tgan. 2019 yil sentabr oyida Ma’naviyat va ma’rifat markazi rahbari etib tayinlangandi.

Endilikda Otabek Abdurashidovich Hasanov Ma’naviyat va ma’rifat markazining yangi rahbari bo‘ldi. U shu vaqtgacha prezident huzuridagi Davlat xizmatini rivojlantirish agentligi direktori birinchi o‘rinbosari sifatida ishlab kelayotgandi.