Energetika sohasi 10 yildan keyin qay holatda bo‘ladi? Vazir javob berdi

Energetika vaziri Alisher Sultonov bugun, 1 fevral kuni I.M.Gubkin nomidagi Rossiya davlat universitetining Toshkentdagi filialida bo‘lib, yoshlar, o‘qituvchilar va OAV vakillari bilan uchrashdi.

Uchrashuv davomida Sultonovga: «Energetika sohasini 5 yildan keyin qanday tasavvur qilasiz?» degan savol bilan murojaat qilindi, deb xabar bermoqda Kun.uz muxbiri.

«Men 5 yil emas, 10 yil keyin – 2030 yil to‘g‘risida gapirsam. Sababi aynan 2030 yilga mo‘ljallangan ulkan rejalar tuzganmiz. Prezident topshiriqlarida ham 2030 yilgacha bo‘lgan strategiyamiz belgilab berilgan.

Aytishim mumkinki, 2030 yilda biz umumiy olinayotgan energiya hajmidagi qayta tiklanuvchi energiya hissasini 30 foizga yetkazmoqchimiz. Shuni ta'kidlashni istardim, ko‘pchilik davlatlar, xususan qo‘shnilarimiz ham hali bunday ko‘rsatkich bilan maqtana olmaydi. Bizda yilning 160 kuni quyoshli, shamolli. Hududlarimiz ham ko‘p va bundan samarali foydalanishimiz kerak.

Qolaversa, bu yil Prezidentimiz tomonidan «Ilm-ma'rifat va raqamli iqtisodiyotni rivojlantirish yili» deb e'lon qilindi. Biz sohamizni raqamli tizimga o‘tkazish bo‘yicha ham yetakchi bo‘lishimiz kerak», – dedi Alisher Sultonov.

Energetika vaziri o‘z nutqida prezident murojaatidan kelib chiqadigan vazifalar, soha muammolarini yechishda yoshlarning o‘rni, vazirlik amalga oshirmoqchi bo‘lgan rejalarga to‘xtalib o‘tdi. Yosh mutaxassislar va talabalarning yangi loyihalari, xalqaro olimpiadalarda qatnashish, sport komplekslari faoliyatini yo‘lga qo‘yish kabi tashabbuslarini qo‘llab-quvvatladi.