17:42 / 12.04.2020
4884
COVID-19 odamdan hayvonga yoki uy hayvonidan odamga yuqishini tasdiqlovchi ma'lumot yo‘q – Otabekov

«Uy hayvonlarida ham koronavirus alomatlariga o‘xshash kasalliklar uchrab turadi, lekin hozirga qadar COVID-19 odamlardan hayvonlarga, hayvonlardan odamlarga o‘tganini tasdiqlovchi hech qanday ma'lumot yo‘q».

Foto: AFP

Bosh davlat sanitariya inspektori Nurmat Otabekov koronavirusning uy hayvonlariga yuqish-yuqmasligi masalasida ma'lumot berdi.

«Koronavirus kasalligining qo‘zg‘atuvchilari qirqdan ko‘proq bo‘lsa ham, undan faqat 7tasigina odamlarda kasallik chaqira oladi. Ularning 4tasi butun dunyoda uchrab turadi va shamollashning belgilari singari namoyon bo‘ladi. Ularning ikkitasi odamlar uchun juda xavfli deb baholangan. Bular: SARS-CoV-1 va SARS-CoV-2 (COVID-19).

Agarda uyingizda boqayotgan itingiz yoki mushugingizda odamlarda kuzatilayotgan koronavirus kasalligi klinikasiga o‘xshash belgilar paydo bo‘lsa, zinhor buni COVID-19 deb o‘ylamang. Itlarda ham, mushuklarda ham gripp, paragripp, mushuklar O‘RS (mushuk astmasi) kuzatilishi mumkin.

Uy hayvonlarida ham ba'zan u yoki bu parazitar kasalliklar natijasida o‘pka yallig‘lanishi (pnevmoniya), o‘pka va yurak yetishmovchiligi, dirofilyarioz kasalligining (gelmintozlar chaqiradigan parazitar kasallik) yurak shakli ham uchraydi. Lekin COVID-19 odamlardan hayvonlarga, uy hayvonlaridan odamlarga o‘tganini tasdiqlovchi hech qanday ma'lumot yo‘q», deya Nurmat Otabekovning so‘zlarini keltirmoqda Kun.uz muxbiri.

Avvalroq virusning asl tashuvchisi ko‘rshapalaklar bo‘lib, kemiruvchilar yoki boshqa ba'zi turdagi hayvonlar oraliq turdagi tashuvchi vazifasini bajargan bo‘lishi mumkinligi, Uxandagi hayvon bozori virus hayvonlardan odamga yuqqan hududga aylangani haqida fikrlar o‘rtaga tashlangandi.

Fevral oyida Xitoy hukumati COVID-19 xastaligini keltirib chiqaruvchi koronavirus epidemiyasining oldini olish maqsadida, yovvoyi hayvonlar go‘shtini sotish va yeyishni taqiqlagan, aprelga kelib Xitoyda it va mushuklarni yeyish taqiqlangandi.

Xitoylik olimlar o‘tkazgan tadqiqotlarga ko‘ra, mushuklarga koronavirus yuqishi mumkinligi aniqlangan. Ammo virusning mushukdan odamga yuqishi haqida tasdiqlangan ma'lumotlar yo‘q.

Mavzu
Koronavirus O‘zbekistonda
15 mart kuni O‘zbekistonda koronavirusga chalingan ilk bemor aniqlandi.
Barchasi
Top