Pentagon IShID yetakchisi yo‘q qilinganini e’lon qildi

Pentagon IShID terrorchilik tashkiloti yetakchilaridan biri Maher al-Agal yo‘q qilinganini rasman e’lon qildi. IShIDning yana bir yetakchisi og‘ir yaralangan, uning shaxsi hali aniqlanmadi. AQSh Suriya shimoli-g‘arbidagi Jindaris shahri yaqinida uchuvchisiz uchoqlardan zarba bergan. Bayonotga ko‘ra, tinch aholi orasida qurbonlar yo‘q.

Al-Agal IShIDning yana bir yetakchisi Abu Ibrohim al-Hoshimiy al-Qurayshiyning o‘limidan bir necha oy o‘tib o‘ldirildi, u AQSh maxsus kuchlari reydi paytida o‘zini portlatib yuborgan. 

IShID 2014-2017 yillarda Suriya hududining salmoqli qismini nazorat qilgan. Hozir esa IShID jangarilari Turkiya chegarasiga quvib chiqarildi va partizanlar urushi taktikasiga o‘tdi. AQSh qurolli kuchlari qo‘mondonligi IShID yetakchilarining yo‘q qilinishi tashkilotning terrorchilik faoliyatini falaj ahvolga keltirib qo‘yishini taxmin qilmoqda. 

Hozirda Suriyada 900 ga yaqin amerikalik harbiy xizmatchi bor. Bayden ma’muriyati kontingentning Suriyada yana qancha bo‘lishi borasida hali aniq muddatni belgilamadi.