11:53 / 27.07.2022
21631
Ota-onalarning yangi o‘quv yilidan yagona formani xarid qilishiga majburiy talab qo‘yilmaydi - Baxtiyor Saidov

Yangi o‘quv yili, 2022 yil sentabr oyidan boshlab ota-onalar yagona formani xarid qilishiga majburiy talab qo‘yilmaydi va maktabga yagona formada kelmagan o‘quvchilarga nisbatan hech qanday e’tirozlar bildirilmaydi.

Videodan kadr

Xalq ta’limi vaziri Baxtiyor Saidov umumta’lim maktablari uchun yagona maktab formasini joriy etish masalasiga doir bayonot bilan chiqdi.

Vazirga ko‘ra, moslashuv jarayoni uchun ma’lum vaqt kerakligini inobatga olib, yagona maktab formasi 2025 yilga qadar bosqichma-bosqich joriy etib boriladi.

“Yangi o‘quv yili, 2022 yil sentabr oyidan boshlab ota-onalar yagona formani xarid qilishiga majburiy talab qo‘yilmaydi va maktabga yagona formada kelmagan o‘quvchilarga nisbatan hech qanday e’tirozlar bildirilmaydi”, dedi vazir.

Mahalliy hokimliklar tomonidan kam ta’minlangan oilalarga mahalliy budjetning qo‘shimcha manbalari hamda “Temir daftar”, “Ayollar daftari” va “Yoshlar daftari” jamg‘armalari mablag‘lari hisobidan maktab formasi sotib olinishiga ko‘mak beriladi.

“Shuningdek, ota-onalarimizga alohida ta’kidlab o‘tmoqchi edim, maktab formasini aynan biror tadbirkordan/korxonadan xarid qilish bo‘yicha maktab ma’muriyati tomonidan majbur etilmaydi va bunday holatga yo‘l qo‘yilmaydi”, dedi vazir.

Top