Ekvador prezidentligiga nomzod saylovga zirhli nimcha va dubulg‘a kiyib keldi

O‘ldirilgan Fernando Vilyavisensio o‘rniga «Construye» harakatidan Ekvador prezidentligiga yangi nomzod bo‘lgan Kristian Surita saylov uchastkasiga o‘q o‘tkazmaydigan jilet va dubulg‘a kiygan holda keldi.

Ovoz bergach, siyosatchi qurollangan politsiyachilar hamrohligida saylov uchastkasini tark etdi.

Qolgan nomzodlar ham kuchaytirilgan xavfsizlik choralari ostida ovoz berishdi, biroq zirhli kiyimlardan foydalanishmadi.

20 avgust kuni Ekvadorda muddatidan oldin prezidentlik va parlament saylovlari bo‘lib o‘tdi. Oliy davlat lavozimiga sakkiz nomzod da’vogarlik qilmoqda.

Xavfsizlik bilan bog‘liq vaziyat og‘ir bo‘lsa-da, saylov uchastkalari ochilganidan keyingi dastlabki uch soat ichida saylovchilarning 20 foizi ishtirok etgani aytilmoqda.

Eslatib o‘tamiz, «Construye» harakatidan Ekvador prezidentligiga nomzod Fernando Vilyavisensio 9 avgust kuni poytaxt Kito shahrida bo‘lib o‘tgan mitingdan keyin otib o‘ldirilgan, shundan so‘ng, Ekvadorning amaldagi prezidenti Gilermo Lasso davlat miqyosida favqulodda holat e’lon qilgan edi.