Qirg‘iziston Andijon suv ombori bo‘yicha kelishuvni ratifikatsiya qildi

Qirg‘iziston prezidenti Sadir Japarov «Qirg‘iziston Respublikasi Vazirlar Mahkamasi va O‘zbekiston Respublikasi Hukumati o‘rtasida 2022 yil 3 noyabrda Bishkekda imzolangan Kampirobod (Andijon) suv ombori suv resurslarini birgalikda boshqarish to‘g‘risidagi bitimni ratifikatsiya qilish haqida»gi qonunni imzoladi.

Hujjatda 3 noyabr kuni Bishkekda imzolangan Kampirobod (Andijon) suv omborining suv resurslarini birgalikda boshqarish to‘g‘risidagi ikki davlat o‘rtasidagi kelishuvni ratifikatsiya qilish taklif etilgan.

«Shartnoma Qirg‘iziston Respublikasi va O‘zbekiston Respublikasi o‘rtasida Qirg‘iziston-O‘zbekiston davlat chegarasining ayrim uchastkalari to‘g‘risidagi bitimga muvofiq tayyorlangan. Uning maqsadi qo‘shma komissiya tomonidan suv ombori suv resurslarini boshqarishdir», — deyiladi prezident matbuot xizmati xabarida.

Bu qonun bilan suv ombori joylashgan hudud O‘zbekistonga tegishli ekani haqidagi bahslarga barham beriladi, ombor ikki davlat tomonidan hamkorlikda boshqariladi.

Japarov shu kuni o‘zbek-qirg‘iz davlat chegarasining 302,29 km uzunlikdagi uchastkalariga doir shartnomani ratifikatsiya qilish bo‘yicha qonunni ham imzoladi.

Avvalroq O‘zbekiston bosh vaziri Abdulla Aripov chegara bitimi tafsilotlarini ma’lum qilgan edi.