O‘zbekiston Respublikasi Oliy Majlisi Qonunchilik palatasi deputati Rasul Kusherbayev telegramdagi kanalida navbatdagi post qoldirdi. Unda deputat normativ-huquqiy hujjatlarga bo‘lgan munosabat haqida fikr bildirgan.
“So‘nggi haftalarda buzilaverib trend darajasiga chiqib, “egilib” qolgan normativ-huquqiy hujjatlar va talablar:
- “Xususiy mulk boshqa mulk shakllari kabi daxlsiz va davlat himoyasidadir” (O‘zbekiston Respublikasi Konstitutsiyasining 53-moddasi);
- “Mulkdor mulkiga o‘z xohishicha egalik qiladi, undan foydalanadi va uni tasarruf etadi” (O‘zbekiston Respublikasi Konstitutsiyasining 54-moddasi);
- “Xususiy mulkni himoya qilish va mulkdorlar huquqlarining kafolatlari to‘g‘risida”gi Qonun;
- Prezidentning 01.08.2018 yildagi 5495-sonli “O‘zbekiston Respublikasida investitsiya muhitini tubdan yaxshilash chora-tadbirlari to‘g‘risida”gi Farmoni 2-3 bandlari;
- Vazirlar Mahkamasining 29.05.2006 yildagi 97-son qarori bilan tasdiqlangan “Davlat va jamoat ehtiyojlari uchun yer uchastkalarining olib qo‘yilishi munosabati bilan fuqarolarga va yuridik shaxslarga yetkazilgan zararlarni qoplash tartibi to‘g‘risida”gi nizomi.
Xalqning ishonchini qozonib, xohish-irodasini ifoda etayotgan hujjatlarni oyoqosti qilib, “xalq xizmatchisi”ga aylanayotganlarga va ayniqsa, ayrim hokimlarga ko‘chmas mulkidan ayrilib, hammasidan to‘yib yurganlar nomidan maxsus “tashakkurlar!”.
Hujjatlar egilyapti, biroq singani yo‘q, chunki ular hali ham kuchda. Faqat noma'lum vaqtgacha ko‘zlar ko‘r, quloqlar kar. Shu bois, ko‘zlar ochilguncha hurmatli “buzuvchi” va “quruvchi”lardan qonunlarni o‘zlari kabi hurmat qilishlarini so‘rardik (ko‘z ochilsa qonunlar buzilmaydi). Zero, qonunga hurmat – xalqqa hurmat belgisi”, - deb yozadi Rasul Kusherbayev.
