Yig‘ilishda chiqish qilgan bosh vazirning birinchi o‘rinbosari Ochilboy Ramatovning ma'lum qilishicha, tumandagi barcha muammolarni bartaraf etish uchun prezident qarori loyihasi tayyorlanmoqda va mazkur qaror loyihasi bo‘yicha tumanni iqtisodiy-ijtimoiy jihatdan rivojlantirish uchun 1 trln. so‘mga yaqin mablag‘ ajratilishi ko‘zda tutilgan.
«Ikki kun davomida yurtboshimiz topshirig‘i bilan ishchi komissiya hududdagi vaziyatni o‘rgandi. Barcha vazirliklar kecha va bugun ishlab, o‘rganish natijalari umumiy dasturga kiritildi. Yurtboshimizning qarori loyihasini tayyorladik.
Dastlabki hisob-kitoblarga ko‘ra, So‘x tumanini rivojlantirish uchun 843 milliard so‘m ajratilishi mo‘ljallangan. Shu yilning o‘zida 288 milliard so‘mlik mablag‘ yo‘naltirilib, 5,5 mingta yangi ishchi o‘rni yaratishga qaror qilindi. Bu juda katta ish, bir hududga shuncha mablag‘ni qisqa muddatda ajratish va rejalarni amalga oshirish.
Asosiy muammolardan biri yo‘l masalasi. Umuman yo‘l yo‘q desayam bo‘ladi. Albatta biz yo‘l xo‘jaligini beton qoplamaga o‘tkazib, Rossiyaga keta olmay qolgan odamlarimizni ish bilan ta'minlash masalasini ko‘ryapmiz. Qo‘l bilan ishlaymiz va bu ko‘p vaqt turadi. Bu orqali mingga yaqin odamga ish topib beramiz. Shu bilan birga, birinchi navbatda infratuzilmani yaxshi qilishga e'tibor berishimiz kerak. Suv masalalari, kanalizatsiya masalalari, kabel, elektr. Avval shu ishlarni tugatib, keyin yo‘lni qilamiz.
Hurmatli bosh vazirimiz aytib o‘tdilar, pul tayyor. Hech qanday muammo bo‘lmaydi. Bu ishlarni tezda qilamiz.
Yana bir masala suv masalasi. Bu yerda suv ko‘p, lekin suvni yetkazib berish muammo. Buni ham vazirliklar bilan birga o‘rgandik. Bugungi kunda tumanda 35 mingga yaqin aholi markazdan uzoqda, suvdan uzoqda yashayapti. Bularning hisob-kitobini oldik, yuz foiz ichimlik suvi bilan ta'minlaymiz. Suv manbasi bor, yetkazib berish masalasini hal qilamiz, trubalar bilan xonadonlarga yetkazib beramiz.
Keyingi masala uy masalasi. Bu yerda bir xonadonda 3-4 oila yashamoqda. Bu zamon talablariga javob bermaydi. Ko‘p qavatli uylar qurish imkoniyatimiz bor. 5 qavatli uylar, kerak bo‘lsa 7 qavatli uylar quramiz. Farg‘onada 16 qavatli uylar quryapmiz.
Bu yerda yer kam, shuning uchun tepaga qarab o‘sishimiz kerak, ko‘p qavatli uylar quramiz. Barcha sharoitlari bo‘ladi. Bu yerda 7 qavatli uylar qura olamiz.
Bu yerda qurilish materiallari sotiladigan do‘konlar ham qilamiz. Ustiga bir so‘m qo‘yilmaydi, xuddi Farg‘ona shahridagi narxlar bo‘ladi.
