AQSh davlat kotibi zarurat bo‘lsa muzokara uchun Eronga boradi

AQSh davlat kotibi Mayk Pompeo zarur bo‘lsa va sharoit taqozo qilsa, Tehronga borib, muzokara o‘tkazishini bildirdi. U Bloomberg agentligiga bergan intervyusida shunday bayonot berdi. 

«Albatta, zarurat paydo bo‘lsa, u yerga bajonidil boraman», — degan Pompeo. 

Avvalroq, Pentagonning yangi rahbari Mark Esper ham AQSh dastlabki shartlarsiz Eron bilan muloqotga tayyor ekanini bildirgan edi. 

Eslatib o‘tamiz, so‘nggi vaqtlarda Hurmuz bo‘g‘ozida ro‘y berayotgan vaziyat AQSh-Eron munosabatlarini keskinlashtirmoqda. Qolaversa, Donald Tramp hokimiyatga kelgach, Eron yadro dasturiga doir xalqaro kelishuvdan bir tomonlama chiqqan edi.