1939-1945 yillardagi Ikkinchi jahon urushida fashizm ustidan qozonilgan g‘alabaning 74 yilligi munosabati bilan hozirda hayot bo‘lgan urush faxriylariga bir martalik pul mukofotlari beriladi.
Kun.uz manbasi xabar berishicha, hukumat yig‘ilishida ayni vaqtda hayot bo‘lgan 878 nafar faxriylarga 7,5 million so‘mdan mukofot berilishi ma'lum qilingan.
Ma'lumot uchun, O‘zbekistonda Ikkinchi jahon urushi faxriylari an'anaga ko‘ra har yilda 9 may arafasida pul mukofotlari bilan taqdirlanadi. Avvalgi yillarda, xususan, 2013 yilda bir martalik pul mukofoti - 500 000 (besh yuz ming) so‘mni, 2014 yilda – 600 000 (olti yuz ming) so‘mni, 2017 yilda 2 000 000 (ikki million) so‘mni, 2018 yilda 5 000 000 (besh million) so‘mni tashkil etgan. Urush qatnashchilari soni o‘tgan yili 1168 nafar edi, bu yil 878 nafar qolgan.
Shuningdek, urush va mehnat fronti faxriylari o‘zlari uchun maqbul muddatlarda yiliga bir marta O‘zbekiston Respublikasi Sog‘liqni saqlash vazirligi, O‘zbekiston Kasaba uyushmalari Federatsiyasi Kengashi hamda davlat va xo‘jalik boshqaruvi organlari sanatoriylarida o‘n ikki kunlik sog‘lomlashtirish kursidan tekin o‘tish huquqiga ega.
1-guruh nogironligi bo‘lgan urush va mehnat fronti faxriylari bir nafar kuzatuvchi shaxs uchun qo‘shimcha tekin yo‘llanma olish huquqiga ega.
Shuningdek, faxriylar temir yo‘l transportida bepul yurish va havo transportida imtiyozli uchish huquqi mavjud.
1-guruh nogironligi bo‘lgan urush va mehnat fronti faxriylari o‘zlarini kuzatib borayotgan bir nafar shaxs uchun ham bepul va imtiyozli yurishga chipta olish huquqiga egadirlar.
