Ijtimoiy tarmoqda IIB xodimlari mashina oynalarini sindirib tashlagani tasvirlangan video tarqaldi. IIV YHXBB axborot xizmati hodisa yuzasidan munosabat bildirdi.
Munosabatda ma'lum qilinishicha, joriy yil 27 noyabr kuni soat 16:10 larda Chiroqchi tumani, "Kommuna" MFY hududidan o‘tgan ichki yo‘lda YPX xodimlari tomonidan Lacetti rusumli mashina to‘xtatilgan.
Ammo haydovchi YPX xodimlarining qonuniy talabni bajarmagan. U mashinaning oynasi va eshiklarini qulflab YPX xodimlariga hujjatlarni taqdim etishdan bosh tortgan. So‘ng mashinani uning yo‘lini to‘sib turgan IIB va YHXB xodimlari ustiga yurg‘izgan.
Mazkur jarayonda xodimlar tomonidan maxsus vositalar qo‘llanilib, haydovchini to‘xtatish choralari ko‘rilganiga qaramasdan u voqea joyidan qochib ketgan.
Qayd etilishicha, hozirda YPX xodimining bildirgisi asosida bo‘ysunmay harakatlangan haydovchi yuzasidan surishtiruv olib borilmoqda.
