OCCRP: Rashid Qodirovning o‘g‘li Dubayda 8 mln dollarlik ko‘chmas mulklarga egalik qiladi

O‘zbekiston sobiq bosh prokurori Rashid Qodirovning o‘g‘li Alisher Qodirov Dubayda 7 mln 975 ming dollarlik ko‘chmas mulk obektlariga egalik qiladi. Bu haqda xalqaro surishtiruvchi jurnalistlarning Uyushgan jinoyatchilik va korrupsiya haqida xabar berish loyihasi (OCCRP) ma’lum qildi.

Qayd etilishicha, Alisher Qodirovning Marina Plaza'da to‘rtta ofisi bor. Har birining qiymati 1,9 mln dollardan 2,1 mln dollargacha baholangan.

Eslatib o‘tamiz, 2018 yilda O‘zbekiston Ichki ishlar vazirligi tomonidan Alisher Qodirovga nisbatan qidiruv e’lon qilingandi.

U O‘zbekiston Respublikasi Jinoyat kodeksining 165-moddasi 2-qismi A-bandi (takroran yoki xavfli retsidivist tomonidan sodir etilgan tovlamachilik), 165-moddasi 3-qismi “a” bandi (juda ko‘p miqdordagi tovlamachilik), 168-moddasi 3-qismi “a” bandi (ko‘p miqdordagi firibgarlik), 168-moddasi 4-qismi “a” bandida (juda ko‘p miqdordagi firibgarlik) nazarda tutilgan jinoyatlarni sodir etishda gumonlandi.

Alisher Qodirovga nisbatan e’lon qilingan qidiruvning joriy holati qandayligi noma’lum, chunki IIVning rasmiy saytidagi qidiruvdagi shaxslarni ko‘rish platformasi ancha paytdan beri ishlamaydi.