Rossiya: Skripallarning maxfiy ko‘chirilishini fuqarolarni o‘g‘irlash sifatida baholaymiz

Rossiyaning Londondagi elchixonasi matbuot kotibi so‘zlariga ko‘ra, Skripallning maxfiy ravishda boshqa joyga ko‘chirilishi Rossiya tomonidan mamlakat fuqarolarining o‘g‘irlanishi deb baholanadi. Bu haqda RIA «Novosti» xabar qilmoqda.

«Agarda Sergey va Yuliya Skripalning boshqa joyga maxfiy ko‘chirilishi amalga oshadigan bo‘lsa, ularning 4 mart kungi hodisalar bo‘yicha versiyasini eshitish imkoniyati yo‘qoladi. O‘z navbatida, ular bilan muloqot imkoniyati yo‘qqa chiqsa, unda butun dunyo bu vaziyatni Rossiyaning ikki fuqarosini o‘g‘irlab ketish yoki, kamida, ularning izolyatsiyasi sifatida baholashga yetarli asosi bo‘ladi», - deya aytib o‘tdi matbuot kotibi.

Uning ta'kidlashicha, ko‘chirish xalqaro huquq normalarining «qo‘pol» buzilishi sifatida baholanadi. Shuningdek uning qayd etishicha, Britaniya tomoni Solsberida GRU sobiq polkovnigi Sergey Skripal va uning qizi Yuliya zaharlanganidan so‘ng konsullik aloqalari bo‘yicha Vena konvensiyasi va ikki tomonlama Konsullik konvensiyasi majburiyatlarini bajarmayapti.