Adliya vaziri yaqin tarixdagi diniy erkinliklarni cheklash bilan bog‘liq muammolar haqida to‘xtaldi

{Yii::t(}

O'tkazib yuborish 6s

O'tkazib yuborish

«Vijdon erkinligi, diniy erkinliklar bo‘yicha O‘zbekistonning yutuqlarini e'tirof etishimiz kerak. Shu o‘rinda bir tendensiyaga to‘xtalib o‘tmoqchiman. Bizda 2100ta islomiy tashkilot, islomiy bo‘lmagan 191ta diniy tashkilot bor. Boshqa dinlarga e'tiqod qiladigan diniy ozchilikka mansublar soni 1,5 millionga yetadi. Ular ham O‘zbekiston fuqarolari.

Vijdon erkinligi nafaqat islom dini bilan bog‘liq bo‘lgan huquqlarni, balki islomiy bo‘lmagan qatlamning huquqlarini ham ta'minlashni anglatadi va bu – davlat sifatida oldimizda turgan eng katta vazifalardan bittasi. Chunki vijdon erkinligi huquqi bu konstitutsiya bo‘yicha hamma fuqarolarga berilgan.

Bitta raqamni aytaman: O‘zbekistonning 4000 nafar fuqarosi – islomiy bo‘lmagan diniy tashkilotlar a'zosi. Yoki ko‘plarining umuman dinga bo‘lgan munosabati boshqacha, yo‘q hech qanaqa munosabat. To‘g‘ri, bu narsa biz o‘zbeklarga yoqmasligi mumkin, lekin bu – to‘g‘ridan-to‘g‘ri qonunda yozilgan kafolat. Shuning uchun Adliya vazirligi sifatida huquqiy nuqtayi nazardan aytishimiz kerakki, bitta dinning ikkinchi dinga nisbatan hech qanday adovati bo‘lmasligi kerak.

Bizda missionerlik faoliyati, prozelitizm bejiz taqiqlanmagan. Nima uchun bunday qilingan? Birinchidan, bu diniy bag‘rikenglik, tolerantlik bo‘lishi uchun qilingan. Ikkinchidan, kimningdir diniy qarashlarini ikkinchi odamga tazyiq orqali singdirishiga umuman yo‘l qo‘yilmaydi va davlat sifatida biz buni ta'minlab berishimiz kerak. Chunki chet elliklar ham o‘zaro suhbatlarimizda shu haqda aytishadi.

O‘zbekiston xalqining 90 foizi musulmon, musulmonlarning diniy haq-huquqlarini ta'minlash bo‘yicha ko‘plab erkinliklar berildi. Bilasizlar, «ibodat libosi» deb qancha chalkashliklarga yo‘l qo‘yilgandi, [ro‘mol yoki hijobda] jamoat joyida yurish bo‘yicha qanday muammolar bor edi, ma'muriy javobgarlikka tortilardi... Hozir bular ko‘pchilikning esidan chiqib ketgan, lekin yaqin tariximizda shu muammolarning barchasi bor edi. Bugun bu muammolar yo‘q.

Shu bilan birga, boshqa yo‘nalishlarda ham biz umuman dunyoviy davlat nuqtayi nazaridan ana shu huquqlarni ta'minlab berishimiz shart va albatta Adliya vazirligi mana shu dunyoviylik prinsipi bo‘yicha har bir shaxsning diniy huquqlarini, shaxsiy huquq va erkinliklarini ta'minlash bo‘yicha ishlarini davom ettiradi», – deya Ruslanbek Davletovning so‘zlarini keltirmoqda Kun.uz muxbiri.

Ochiq muloqot davomida «Nodavlat notijorat tashkilotlari to‘g‘risida»gi kodeks ishlab chiqilayotgani ma'lum qilindi.

«383ta nodavlat notijorat tashkilotini davlat ro‘yxatidan o‘tkazdik, 714tasi qayta ro‘yxatdan o‘tkazildi. «Nodavlat notijorat tashkilotlari to‘g‘risida»gi yangi kodeksimiz ishlab chiqilgan bo‘lib, uni ayni paytda vazirliklar bilan birga takomillashtiryapmiz. Shu bois, uni hukumatga taqdim qila olmayapmiz, chunki ichida juda katta masalalar bor. Hujjat yuzasidan chet ellik hamkorlarimiz o‘z fikrlarini bildirishgan. Yil oxirigacha uni albatta taqdim qilamiz», deydi vazir.