Andijonda AI-80 markali benzinni AI-92 yoki AI-95 deb sotayotgan AYoQShlar aniqlandi

Andijon viloyatidagi AYoQShlarga 500 tonna AI-80 markali benzin olib kelingan bo‘lishiga qaramay, haydovchilar tomonidan ushbu markadagi benzin yetishmayotgani haqidagi murojaatlar ko‘paygan. Bu haqda viloyat hokimligi axborot xizmati xabar berdi.

Ma’lum qilinishicha, hozirda viloyat hokimi va mutasaddilar tomonidan vaziyatni o‘rganish va shoxobchalarni tekshirish ishlari boshlangan.

«Bu bo‘yicha ishchi guruh tashkil qilingan. Andijon viloyatida joylashgan AYoQShlarda sotilayotgan mahsulotlardan namunalar olinyabdi. AI-80 markali benzin AI-92 yoki AI-95 deb sotilayotganligi haqidagi e’tirozlar ko‘p. Ishchi guruh tomonidan joriy yilning 14-15 dekabr kunlari namunalar olingan. Xususan, 14 dekabrda olingan 17 ta namunadan 7 tasida aktan miqdori sotilayotgan markaga to‘g‘ri kelmagani aniqlandi. Maskur holatlar Andijon shahri va Andijon tumanidagi «zapravka»larda kuzatildi, chunki dastlabki o‘rganishlar shu hududlardan boshlangandi», deydi «Energiyainspeksiya» Andijon hududiy boshqarmasi boshlig‘i o‘rinbosari Sirojiddin Muxtorov.

Avvalroq, oktabr oyida 6 million 105 ming litr neft mahsulotlarining sifatsizligi aniqlangani xabar qilingandi.