Yangi Toshkentda o‘zaro uyg‘un metro va tramvay tarmoqlari quriladi

“Agar buni boshlamasak, Toshkentda 5 yildan keyin odamlar yasholmaydi”, deya Yangi Toshkent shahri qurilishiga izoh berdi prezident Shavkat Mirziyoyev.

“32 yil ichida birinchi marta namunaviy, jahon standartlariga mos loyiha qilyapmiz. Bu 300-400 yilga, nevara-chevara va hokazo kelgusi avlodlarimizga qolishi kerak, bizdan keyingi avlod ham buni davom ettirishi kerak”, – deya qayd etdi davlat rahbari.

Prezident bu haqda 5 sentabr kuni, Yangi Toshkent shahri bosh rejasining davlat rahbari uchun qilingan taqdimotida aytib o‘tdi.

Qurilish vaziri o‘rinbosari, Yangi Toshkent shahrini barpo etish direksiyasi rahbari Davronjon Odilovning aytishicha, transport-logistika masalasi bo‘yicha Janubiy Koreya, Germaniya va Turkiyadan mutaxassislar jalb qilinib, hozirgi mavjud Toshkent shahrining transport makromodeli yaratilgan.

“Ikkita metro liniyamiz yangi shahar bilan bog‘lanadi. “Buyuk ipak yo‘li” va “Do‘stlik” metro bekatlaridan 30-35 daqiqada yangi shaharga yetib kelish imkoniyati yaratiladi. Bu aholi uchun juda katta qulaylik bo‘ladi, avtomobilda kelishga ehtiyoj ham qolmaydi”, – dedi Davronjon Odilov “Menimcha” teleko‘rsatuvida namoyish etilgan intervyusida.

Taqdim etilgan eskizga qaraganda, shaharda o‘zaro bog‘langan metro va tramvay tarmog‘ini qurish rejalashtirilmoqda.

Yangi Toshkentga boradigan metro “Do‘stlik” metro bekatidan boshlanishi avvalroq xabar qilingan edi. Shuningdek, “Chilonzor” yo‘lini “Buyuk ipak yo‘li” bekatidan TTZ mavzesigacha uzaytirishga oid rejalar prezidentga taqdimot qilingan. 2021 yildagi taqdimotda yerosti liniyasi yotqizishning ikkita – Mirzo Ulug‘bek ko‘chasi yoki Buyuk ipak yo‘li ko‘chasi variantlari ko‘rib chiqilayotgani aytilgandi.

2022 yil noyabrida Shavkat Mirziyoyevning Parijga tashrifi chog‘ida Toshkent tramvayini qurish bilan Fransiyaning Alstom kompaniyasi shug‘ullanishiga kelishilgandi.