«Ўзбекистонда ишлаб чиқарилган BYDʼлар четдан олиб келинадиганларидан арзон бўлади» — «BYD Uzbekistan Factory» бош директори

Ўзбекистонда BYD'нинг E2, Seagull ва Yuan каби оммабоп моделларини  ишлаб чиқариш режалаштирилган. Бу ҳақда «BYD Uzbekistan Factory» бош директори Шафқатбек Алимов «Ўзбекистон 24» телеканалига берган интервьюсида айтиб ўтди.

«Таннархни пасайтириш ва оммабоп моделларни халққа тақдим этиш масаласи ҳам биринчи ўринда белгиланган. Янги моделларни кўрсатдик. Хусусан, E2, Seagull ва Yuan каби оммабоп моделлар манзур бўлди», деди Шафқатбек Алимов.

Унинг қўшимча қилишича, Ўзбекистонда ишлаб чиқарилган BYDʼлар чет элдан олиб келинаётган машиналардан арзон бўлади.

«BYD бозорга кириб келгандан бери нарх-наво тушиб боряпти. Бу ҳолат бундан кейин ҳам давом этади. Ҳозир аниқ рақамлар билан айтишим қийин, лекин Ўзбекистонда ишлаб чиқарган машинамиз, четдан олиб келиб сотилаётган машинадан арзон бўлади. Маҳаллийлаштиришни кучайтирганимиз сари логистик харажатлар камаяди, қўшилган қиймат ортади ва таннарх ҳам ўз-ўзидан тушиб боради. Электромобилларнинг таннархига таъсир қиладиган энг асосий нарса бу – уларнинг батареяси. Ўтган йили батареяси 1 киловаттининг баҳоси 132 доллар эди, бу йил 100 долларга яқинлашди. 2025 йилга бориб, 50 долларга яқинлашади деган прогнозлар бор. Чунки технология ривожланяпти, ишлаб чиқариш ҳажми ортяпти», деди Алимов

Шунингдек, Ўзбекистонда ишлаб чиқарилган моделлар экспорт қилинганида, ўша бозорларга Хитойда ишлаб чиқарилган электромобиллар олиб келинмайди.

Эслатиб ўтамиз, жорий йилнинг январ ойида Жиззахда «BYD Uzbekistan Factory» қўшма корхонаси ишга туширилганди. Бу қиймати 160 миллион долларлик лойиҳанинг биринчи босқичи бўлиб, йилига 50 минг дона электромобил ишлаб чиқариш қувватига эга.