Ўзбекистонда BYD Seagull вa E2 электромобилларини ишлаб чиқариш бошланади

BYD Uzbekistan Factory хитойлик ҳамкорлари билан янги моделларни ишлаб чиқариш бўйича келишувга эришган. Бу ҳақда «Ўзавтосаноат» АЖ матбуот хизмати хабар берди.

Компания хабарида келтирилишича, ишлаб чиқариш учун кўзда тутилган янги моделлар орасида BYD Seagull вa E2 ҳам бор. Уларнинг биринчи намуналари синов лабораторияларида текширилмоқда.

«BYD Seagull вa E2 моделлари учун сертификат синовларини ўтказиш мақсадида ушбу автомобиллар UzTest давлат муассасасининг Quality and Safety Testing синов лабораториялари комплексига топширилди», дейилади хабарда.

Қўшимча қилинишича, Техник тартибга солиш агентлиги билан ҳамкорликда Ўзбекистон бозорига таклиф этиладиган автомобиллар учун янги стандартлар ишлаб чиқилмоқла. Бу стандартлар хизмат кўрсатиш ва кафолат шартлари, халқаро экологик стандартларга мувофиқлик, хавфсизлик талабларига риоя қилиш, шунингдек, янги энергия манбаларидаги автомобил аккумуляторларини хавфсиз қайта ишлаш ва утилизацияни ўз ичига олади.

Маълумот учун, жорий йилнинг 27 июн кунидан Жиззахдаги заводда BYD’нинг Chazor ва Song Plus Champion моделларини ишлаб чиқариш бошланганди. Шундан сўнг, «Ўзавтосаноат» раҳбари Улуғбек Рўзиқулов хитойлик ҳамкорлар билан В, С ва бюджет сегментидаги автомобиллар ишлаб чиқариш бўйича келишувларга эришилгани, уларнинг биринчи намуналари синовдан ўтказиш учун лабораторияларга топширилганини маълум қилганди.

Аввалроқ, BYD Uzbekistan Factory бош директори Шафқатбек Алимов Ўзбекистонда ишлаб чиқарилган BYDʼлар четдан олиб келинадиганларидан арзон бўлишини айтиб ўтганди.