Иқтисодиёт | 16:02 / 11.05.2024
10314
2 дақиқада ўқилади

Ўзбекистон кетма-кет иккинчи ой энг кўп олтин сотган давлат бўлди

Ўзбекистон Марказий банки март ойида дунёнинг бошқа мамлакатларига қараганда кўпроқ – 11 тонна олтин сотди.

Фото: chinadaily

Ўзбекистон март ойида ҳам олтин савдоси бўйича дунёда биринчи ўринни эгаллади. Бу ҳақда Жаҳон Олтин Кенгашининг (WGC) ойлик маълумотларида келтириб ўтилган.

Ҳисобот даврида жаҳон марказий банкларининг жами олтин захиралари 16 тоннага ошган. Хусусан, харидлар ҳажми 40 тоннани, сотувлар ҳажми эса 25 тоннани ташкил этган.

Март ойида қимматбаҳо металларнинг энг фаол харидорлари Туркия (14 тонна), Хитой (5 тонна) ва Ҳиндистон (5 тонна) Марказий банклари бўлди.

Мазкур вақтда олтиннинг асосий сотувчиси Ўзбекистон Марказий банки бўлди ва ўз захираларини 11 тоннага қисқартирди. Шунингдек, Таиланд (10 тонна) ва Иордания (4 тонна) Марказий банклари томонидан ҳам катта миқдорда олтин сотилган.

Аввалроқ, Ўзбекистон февралда энг кўп олтин сотган давлат бўлгани хабар қилинганди. 2023 йил якуни бўйича эса дунёда иккинчи энг кўп олтин сотган мамлакат бўлганди. Хусусан, ўтган йилда 8,2 млрд долларлик олтин экспорт қилинган.

Статистика агентлиги маълумотларига кўра, март ойида Ўзбекистон 1,35 млрд долларлик, йил бошидан буён эса 2,66 млрд долларлик олтин экспорт қилган. Бу мамлакат умумий экспортининг 41,7 фоизини ташкил этади.

Мавзуга оид