Ўзбекистон март ойида 1,35 млрд долларлик олтин экспорт қилди

Март ойида Ўзбекистон 1,35 млрд долларлик, йил бошидан буён эса 2,66 млрд долларлик олтин экспорт қилди.

Фото: Bloomberg

2024 йилнинг январ-март ойларида Ўзбекистоннинг ташқи савдо айланмаси 15,8 млрд долларни ташкил этди, бу 2023 йилнинг шу даврига нисбатан қарийб 1 млрд доллар ёки 6,2 фоизга кўп.

Статистика агентлиги маълумотларига кўра, экспорт 10 фоизга — 6,38 млрд долларгача ошди. Импорт 9,44 млрд долларгача ортди. Ташқи савдо тақчиллиги бироз қисқарди ва 3,05 млрд долларни ташкил этди, бу 2023 йилга нисбатан 232,2 млн долларга кам.

Биринчи чоракда олтин экспорти 10,5 фоизга ошиб, 2,66 млрд долларни ташкил этди (2023 йилнинг биринчи чорагида 2,41 млрд доллар бўлган). Бу мамлакат умумий экспортининг 41,7 фоизини ташкил этади.

Март ойида 1,35 млрд доллардан ортиқ қийматдаги ёки феврал ойидаги билан (1,32 млрд доллар) деярли бир хил миқдорда олтин экспорт қилинди.