Рейтинг етакчилари
Халқаро шахмат федерацияси (FIDE) рейтингида норвегиялик Магнус Карлсен 2823 очко билан биринчи ўринни эгаллаб турибди. Иккинчи ўринда 2792 очко билан америкалик Ҳикару Накамура бормоқда. Октябрь ойидаги расмий рейтингда учинчи ўринни яна бир америкалик Фабиано Каруана (2784) банд этган, унинг кўрсаткичи сентябрь ойига нисбатан 5 пунктга пасайди. Кейинги ўринлардан Синдаров (2782) ва Абдусатторов (2780) жой олган.
Йил давомида иккинчи марта
Тарихда илк бор 2026 йил апрель ойида бирданига икки нафар ўзбекистонлик шахматчи кучли бешликка кирган эди. Ўшанда Абдусатторов 2780 очко билан тўртинчи бўлган, Кипрдаги даъвогарлар турнирида ғолиб чиққан Синдаров эса олти поғона юқорилаб, 2776 очко билан бешинчи ўринни эгаллаганди. Июнь ойида ҳам иккаласи бешликда қолди.
Ёзда Абдусатторов кучли бешликдан чиқиб кетди: июль ойида у олтинчи бўлди, августда саккизинчи ўринга тушиб кетди. FIDE’нинг октябрь ойидаги рейтингида ўзбекистонлик жуфтлик яна кучли бешликдан жой олди. Синдаров 2782 очко (+4) билан тўртинчи ўринни сақлаб қолди, Абдусатторов эса 2780 (+18) очко билан бешинчи ўринга кўтарилди. Бунга Ўзбекистон терма жамоаси ғалаба қозонган Самарқанддаги Олимпиадада биринчи тахтада қўлга киритилган олтин медал ёрдам берди. 2780 рейтинги Абдусатторовнинг шахсий рекордини такрорлайди.
Синдаров топ-учликда
Жавоҳир Синдаровни учинчи ўриндан икки пункт ажратиб турибди. live-рейтингда у аллақачон Каруанани ортда қолдирди. Бу ҳолат америкалик шахматчининг АҚШ чемпионатида Энди Вудворддан учраган мағлубиятидан кейин юз берди. Шу тариқа Синдаров ўз фаолиятида ва ўзбек шахмати тарихида илк бор учинчи ўринга кўтарилди. 1 октябрдаги рўйхат расмий бўлиб қолмоқда, кейингиси 1 ноябрда эълон қилинади.
Гукеш: ўзининг энг юқори кўрсаткичидан 84 пункт пастда
Амалдаги жаҳон чемпиони, ҳиндистонлик Гукеш Доммаражу Олимпиадада 7 очко жамғарди ва ҳозир 2710 рейтинг билан 28-ўринда бормоқда. У ўзининг энг юқори — 2794 кўрсаткичини 2024 йил октябрь ойида қайд этган эди. Гукеш Олимпиадани Ҳиндистон терма жамоасининг тўртинчи тахтасида ўтказиб, кумуш медални қўлга киритди. Сўнгги турда Глеб Дудинга имкониятни бой бериши уни яккалик баҳслардаги олтин медалдан маҳрум қилди.
