Венесуэлада 25 июнь куни содир бўлган эгизак зилзилалар оқибатида ҳалок бўлганлар сони 1500 кишига яқинлашди. Мамлакатнинг энг кўп зарар кўрган Ла-Гуайра штатига хорижий қутқарув гуруҳлари етиб келмоқда.
Reutersʼнинг ёзишича, Каракасдан тахминан 40 км шимолда жойлашган ушбу штатда ўнлаб бинолар вайрон бўлиб, қум ва вайроналар уюмига айланган.
«Қутқарув ва тиклаш ишлари давом этмоқда. Бугун (якшанба) биз одамларни тириклайин қутқардик, шунинг учун операциялар тўхтатилмайди. Биз ҳар доим умидни сақлаб қоламиз», деди муваққат президент Делси Родригес. Шунингдек, у биноларнинг яшаш учун яроқлилигини аниқлайдиган президент комиссияси тузилганини эълон қилди.
Бир нечта вазирлари ҳамроҳлигида гапирган Родригес мактабларда дарслар яна бир ҳафтага тўхтатилишини ва Ла-Гуайрада электр таъминоти 75% гача тикланганини айтди.
Аввалроқ Миллий Ассамблея раиси Хорхе Родригес якшанба куни қурбонлар сони 20 кишига кўпайиб, 1450 нафарга етганини маълум қилганди. Унинг қўшимча қилишича, 3150 киши жароҳатланган, 12 721 киши уй-жойини тарк этишга мажбур бўлган ва 774 та бино вайрон бўлган.
«Биз ҳаётларни қутқаришни давом эттириш ва уйларидан айрилган ёки қандайдир сабабларга кўра ўз турар жойларига қайта олмаётган одамлар яшаши учун лагерлар қуриш учун ўта оғир ва ҳал қилувчи соатларни бошдан кечирмоқдамиз», деди у.
2600 дан ортиқ хорижий қутқарувчилар етиб келгунига қадар маҳаллий аҳоли ва кўнгиллилар кунлаб вайроналар остидан омон қолганлар ва жасадларни олиб чиқди. Улар кўпинча оғир техника етишмаслиги ва расмийларнинг камлигидан шикоят қилишди. Шу билан бирга юзлаб афтершоклар зарарни янада кучайтирди ва аҳолини хавотирда ушлаб турди.
Шу дам олиш кунларида ҳукумат шанба оқшомига қадар камида 33 киши, жумладан бир нечта болалар қутқарилганини, бироқ ўн минглаб одамлар ҳамон бедарак йўқолганлар рўйхатида қолаётганини маълум қилди.
