ИИБ бошлиғи устидан суд: “Давлат сири” деган важ билан судда ОАВ иштироки чекланди

24 октябр куни Фурқат тумани ИИБ мансабдорлари устидан навбатдаги суд мажлиси бўлиб ўтди. Унда жабрланувчи аёл ечинтирилгани айтилаётган “тезкор тадбир” иштирокчиси бўлмиш ИИБ ходимлари гувоҳлик берди. “Солиқ идораси бошлиғи мактаб ўқувчисини хизмат уйига олиб кириб кетди, деб хабар беришганди”, деди ўз кўрсатмасида ИИБ тезкор ходими Юсуфбек Ёқубов.

Фурқат тумани собиқ ИИБ бошлиғи Акмал Хўжаев ва Гулираъно Қосимова

Фарғонада ИИБ ходимлари томонидан таҳқирланган Гулираъно Қосимова иши доирасида навбатдаги суд мажлиси бўлиб ўтди. Унда солиқ инспекцияси бошлиғининг хизмат уйида ўтказилган “тезкор тадбир” иштирокчилари Ғайрат Отақулов, Юсуф Ёқубов, Тоҳир Баширов, Соҳиб Назаров, Аъзам Ҳамиджонов, Азиз Мамажонов, Элбек Муҳаммаджонов, Дилшод Қаҳҳоров ҳамда Муҳаммаджон Ортиқов гувоҳ тариқасида сўроқ бериш учун қатнашди.

Дастлаб “тезкор тадбир”нинг бевосита иштирокчиси бўлган, ўша пайтда Фурқат тумани ИИБнинг терроризм бўлимида тезкор ходим бўлиб ишлаган Юсуфбек Ёқубовнинг кўрсатмаси тингланди:

“2025 йил 17 апрел куни туман солиқ инспекцияси бошлиғи хизмат хонасига мактаб ўқувчисини олиб кириб кетди, деган хабар келиб тушди. Бу хабарни рўйхатдан ўтказмаганман. Тезкорлик билан ўша ерга бордик. Биз ҳовлига эшикдан кирдик, девордан сакраб ўтмаганмиз. Эшикдан кирган заҳоти 2-қаватга кўтарилдик. 2-қаватда солиқ бошлиғи ва мактаб директорини қип-яланғоч ҳолатда кўрдик. Бизга хабар берган шахс хизмат уйига мактаб формасидаги ёш қиз кириб кетди деганди. Кўрдикки, у ерда мактаб ўқувчиси эмас, мактаб директори экан. Шундан кейин бошлиқ ўринбосари Жасур Расулов бизга ҳаммаси жойида пастга тушаверинглар, деди”, дея кўрсатма берди Юсуфбек Ёқубов.

Шундан сўнг ЖИБ Қува тумани суди раиси Авазбек Раҳимов тезкор ходимлар кўрсатмасида давлат сири борлигини айтиб, гувоҳ тариқасида чақирилган тезкор ходимларнинг кўрсатмаси ёпиқ тарзда эшитилишини маълум қилиб, Kun.uz мухбирини суд залидан чиқариб юборди.

Маълумот учун, очиқ суд мажлисида оммавий ахборот воситаларидан фақат Kun.uz мухбири иштирок этмоқда.

Кейинроқ суд иши 29 октябрга қадар танаффус эълон қилгани маълум бўлди.

Эслатиб ўтамиз, Kun.uz олдинроқ Фурқат туманида мактаб директори бўлган Гулираъно Қосимова билан содир бўлган ҳолат ҳақида суриштирув эълон қилганди. Унда Фурқат тумани ИИБ ходимлари аёлни калтаклаб, кийимларини йиртиб, яланғоч ҳолда тасвирга олгани ҳақида гап боради. Ҳолат Сенат қўмитаси томонидан назоратга олинган. Омбудсман Фурқат тумани ИИБнинг 4 нафар масъул ходими жиноий жавобгарликдан озод этилганини маълум қилиб, ҳолатга алоқадор бўлган ҳар бир шахснинг қилмиши тўлиқ ва холисона ўрганилишини сўраган.

Аввалги суд мажлисида кўрсатма берган Фурқат туман солиқ инспекцияси собиқ бошлиғи, иш бўйича жабрланувчилардан бири бўлган Қурбонали Абдураҳмонов ўзи билан бир вақтда ишлаган туман ИИБ бошлиғи Акмал Хўжаев унга милиция ходимлари кунига 20 та телевизор олиб берасан деган топшириқ берганини, у рад этганидан сўнг ИИБ бошлиғи “ИИБга қарши чиқиш қандай бўлишини кўрсатиб қўйиш” билан таҳдид қилганини эслаганди.

22 октябр куни ўтган суд мажлисида эса гувоҳ тариқасида чақирилган ИИБ ходимлари Ғайрат Отақулов ва Юсуф Ёқубов судга келмагани боис судланувчилар Акмал Хўжаев (собиқ ИИБ бошлиғи) ва Жасур Расулов (ИИБ бошлиғининг собиқ ўринбосари) гувоҳлар эшитилмай туриб кўрсатма бермасликларини айтганди.