Чирчиқ шаҳрида икки нафар ИИБ жиноий жазога тортилди. Kun.uz суд ҳужжати билан танишди.
Кафедаги жанжал
Суд ҳукмига кўра, жабрланувчи Ш.М. 2026 йил 17 феврал куни овқатланиш мақсадида таниши билан Чирчиқ шаҳридаги “Бек” номли кафега борган. Шу вақт кафенинг умумий залида аёл киши маст ҳолатда атрофдагилар билан жанжаллаша бошлаган. У администратор қиз билан ҳам тортишган. Ш.М. жанжални тўхташи мақсадида аёлларни ажратиб қўйишга уринган. Шунда маст аёл “Сен аралашма, қоч бу ердан”, дея нари кетган.
Орадан кўп ўтмай ўша аёл Ш.М. ўтирган стол ёнига келган ва барчани суратга олиб, “Ҳозир ўғлим Умид билан Ислом бухарский келади” дея чиқиб кетган.
Шундан сўнг тахминан 20 дақиқалар ўтганидан кейин кафега бир нечта шахслар келган. Ш.М.га уни ташқарида “Ислом бухарский” чақираётганини айтишган. Ш.М. ташқарига чиқиб, унинг олдига борган.
“У билан тахминан 10 нафар йигит келганини кўрдим. Улар билан бирга ИИБ ППХ ходимлари ҳам туришганди. “Ислом бухарский” мени кўриб, “Бўлди, қайтиб кириб кетавер” деди. Шунда йигитларнинг бири қўлимдан тортиб, ўзига қаратганида ортимдан Умид жағ қисмимга кутилмаганда мушти билан урди. Ерга йиқилдим. Йигитлар турғизишди. Кафе ичкарисига кириб, қонаган жойларимни ювдим.
Сўнгра ташқарига чиққанимда ҳамма кетиб бўлган экан. Уйга кетиш учун йўл четига чиқиб, такси тўхтатиб турган вақтимда олдимга давлат рақами ечилган оқ рангли Gentra келди. Йўловчи ўриндиқ томонидан ўзини Ислом деб таништирган шахс тушди. У “Умид менинг ўртоғим бўлади, агар жажданг бўлса сўравол, эртага кўришамиз” деди ва ўзининг телефон рақамини берди.
Шундан сўнг, халиги йигитлардан 4-5 нафари келди. Улардан “Гера” (Қурбонали Супонов - таҳририят) лақаблисини танирдим. Мени кафе автотураргоҳида турган Эпика машинасига ўтирғизмоқчи бўлишди. Улардан қочиб кетдим. Ортимдан қувишди. Тахминан бир километр масофагача қочиб, кейин чарчаб тўхтадим. Машинада ортимдан келган шахслар тушиб, “Гера” бир мушт урди. Қолганлари оёқлари билан тепишди. Шу билан нима бўлганини эслолмайман”, деган Ш.М. суддаги кўрсатмасида.
Калтакланган Ш.М. тез тиббий ёрдам машинасида Чирчиқ шаҳар марказий шифохонасига олиб борилган. Сўнгра ИИБ ходимлари келиб, уни жанжал содир бўлган ҳудуддаги ИИБ биносига олиб кетишган.
Яширилган жиноят
