Ким Чен Ин камикадзе-дронлар ишлаб чиқаришни кўпайтиришни талаб қилди

КХДР Миллий мудофаа академияси дронлар институти Шимолий Корея етакчиси Ким Чен Ин иштирокида камикадзе-дронларни синовдан ўтказди, деб хабар берди Корея марказий ахборот агентлиги 26 август, душанба куни. Расмий маълумотларга кўра, синовлар муваффақиятли ўтган – дронлар белгиланган йўналишлар бўйлаб учиб, нишонларни топиб, уларни йўқ қилган.

Ким Чен Ин камикадзе-дронларни ишлаб чиқаришни кўпайтириш ва Шимолий Корея армиясини тактик пиёда ҳамда махсус операциялар бўлинмаларида фойдаланиш учун ушбу турдаги қуроллар билан тезкорлик билан жиҳозлашга чақирди. Хусусан, агентлик ҳисоботида сувости дронлари, ҳужумкор дронлар ва разведкачи учувчисиз учиш қурилмалари тилга олинган.

КХДР аввалроқ сувости ядровий дрон синовлари ҳақида эълон қилди 

2024 йил бошида Шимолий Корея ядровий каллак билан жиҳозланиши мумкин бўлган "Хэиль-5-23" сувости дрон тизимини синовдан ўтказаётганини эълон қилди. КХДР Мудофаа вазирлиги бу АҚШ, Япония ва Жанубий Кореянинг Япон денгизида ўтказган уч кунлик ҳарбий машғулотларига жавоб эканлигини маълум қилди.

"Хэиль-5-23" тизимининг мавжудлигини мустақил тасдиқлаш имкони йўқ. Пхенянга кўра, сувости дрони илк бор ўтган йилнинг март ойида синовдан ўтказилган ва у душман кемалари ҳамда муҳим портларга кутилмаган ҳужумлар уюштиришга қодир.

КХДР Жанубий Кореяга чиқинди шарларини учиришда давом этмоқда

КХДР ракета ва учувчисиз учоқларни синовдан ўтказиш билан бир вақтда Жанубий Корея томон чиқинди солинган шарларни учирмоқда. Май ойидан бери Пхенян Жанубий Кореяга чиқинди билан тўлдирилган икки мингдан ортиқ шар жўнатди. Июл ойи охирида шарлардан бири Жанубий Корея президенти идораси биносига тушди.

КХДР расмийлари жанубий қўшнисига «самимий совғалар» чегара ҳудудларида Ким Чен Ин режимини танқид қилувчи «тарғибот материаллари тарқатилишига жавоб» эканини айтди.