Олти метрли Maybach купеси ташқи кўринишининг махфийлиги қолмади

Интернет тармоғида Vision Mercedes-Maybach 6 концепт карининг илк суратлари пайдо бўлди. Ушбу олти метрлик, «чайка қаноти» эшикларига эга бўлган купе машина расман 18-август куни АҚШнинг Пэббл-Бичида бўлиб ўтадиган Жозибадорлик фестивалида тақдим этилади. Машинанинг суратларини Carscoops.com нашри эълон қилган.

Ҳозирча, унинг бошқа хусусиятлари ва техник жиҳатларига оид тафсилотлар мавжуд эмас. Суратлардан бирида, тўлиқ диодли ёруғлик техникасини, эшик панелларига ўрнатилган сенсорли бошқарув элементлари ҳамда барча зарурий ахборотни олди ойна ва салоннинг йўловчи томонига чиқарувчи проекцион дисплейни кўриш мумкин. 

Maybach купесининг прототипи 12-август куни эълон қилинган эди. Унинг илк тизери 15-августда пайдо бўлган, 17-август куни компания видеолавҳасини эълон қилганди. Унда, ёруғлик диодларидан кўплаб фойдаланилгани ва эшикларининг тепага очилиши ойдинлашганди.