Ҳинд чегарачилари Покистондан келган кабутар "элчи"ни қўлга олишди

Ҳиндистоннинг Панжоб штатидаги чегарачилар, мамлакат бош вазири Нарендра Модига жанговар руҳда битилган мактубни олиб кетаётган кабутарни ушлаб олишди. Бу ҳақда Times of India нашри ёзмоқда. 

Хат ташувчи қуш штат шимолидаги Патханкот туманида ушланган. Полициянинг хабарига кўра, кабутардаги мактубда: "Қадрли Моди, бизларни 1971 йилги урушдаги кишилар деб ўйлама. Энди ҳар бир чақалоқ Ҳиндистонга қарши курашишга тайёр", деган сўзлар битилган бўлган.

Нашрнинг ёзишича, бу Покистондан юборилган биринчи мактуб эмас. 1 октябрь куни минтақада шу каби хатлар солинган иккита ҳаво шари топилган эди.